WATOA MBINU KUEPUSHA ONGEZEKO LA WATOTO WANAOISHI MAZINGIRA MAGUMU

VIJANA na watoto zaidi ya 400 wanaoishi katika mazingira magumu wameomba jamii kufanya uamuzi sahihi pale wanapohitaji kuwa na mwenza wao wa kuishi ikitajwa kuwa chaguo hilo linachochea kuongezeka kwa upendo na itasaidia kuepusha watoto wanaoishi mazingira magumu kuongezeka hapa nchini.

Moja ya sababu la ongezeko la watoto wanaoishi mazingira magumu unasababishwa na baadhi ya wazazi kutokuwa na upendo na mwenza wake zaidi ya kuhitaji zaidi starehe hali inajitokeza pindi mtoto anapopatikana uhusiano wao huanza kuyumba na kuvunjika.

 

Wakizungumza katika kongamano la vijana lililoandaliwa na Umoja wa Makanisa ya Kipentekoste na Kiinjili Klasta ya Morogoro (Compassion Internation Tanzania) mjini Morogoro Agosti 14, 2023 wamesema wazazi wanaochukua maamuzi sahihi ya kupata mwenza wake, watoto wanaowapatikana wamekuwa wakilelewa katika mazingira mazuri na wazazi wote wawili tofauti na wale ambao hawakufanya uchaguzi sahihi.

 

Kijana kutoka Kanisa la Tanzania Assemblies Of God, Ebeneza Chamwino, Dotto Rangers (20) amesema wazazi wanaofanya chaguo sahihi la kutafuta mwenza wa kuanzisha maisha na pindi wanapopata watoto huwalea kwa upendo tofauti na wazazi walioparamia mke ama mume kwa ushawishi wa tamaa ya kimwili.

 

“Kama ikifanyika sensa ya watoto na vijana wanaoishi katika mazingira magumu nina imani wengi wao watakuwa wale wanaolelewa na mzazi mmoja hasa mwanamke atakuwa ametekelezwa na mume wake na mtoto kukosa malezi bora,” amesema Dotto.

 

Mratibu wa vituo vya huduma ya maendeleo ya mtoto na kijana klasta ya Morogoro, Lucas Kiluwasha amesema umoja huo una zaidi ya miaka 20 tangu kuanzishwa kwake na katika kuelekea kongamano hilo wamepanda miti 36 ya kivuli katika vituo vyao na mwaka ujao wanatarajia kuongeza kasi ya upandaji miti 500 ili kuungana jamii katika kutunza mazingira.

 

Kiruwasha amesema kongamano hilo pia limelenga kutoa elimu sekta ya mazingira inayosababishwa na mabadiliko ya tabia ya nchi na kulekea jamii kukosa mvua baada ya kuharibu mazingira.

 

Mhadhiri wa saikolojia na elimu Chuo Kikuu cha Sokoine cha Kilimo (Sua) Kampasi ya Mazimbu Morogoro, Yohana Richard amesema endapo wazazi wakiwa na umoja, upendo na mshikamano kwa kila jambo linalofanywa wana nafasi kubwa ya kuelewa na ndoa yao itadumu zaidi.

 

“Chanzo cha kuwa na watoto wengi wanaoishi mazingira magumu katika jamii kunatokana na wazazi kupungukiwa na upendo wa dhati kwa mmoja wao na kusababisha mmoja wa wazazi kuelemewa na malezi baada ya mwenzake kumtekeleza,” amesema Richard.