WAFANYABIASHARA WADOGOWADOGO MANISPAA MOROGORO WAELEZA JINSI WANAVYONUFAIKA NA VITAMBULISHO VYA WAJASIRIAMALI.

 

Mjasiriamali akionesha Kitambulisho chake.

WAFANYABIASHARA wadogo wadogo Manispaa ya Morogoro , wamefurahishwa na kuelezea jinsi wanavyonufaika na Vitambulisho vya Wajasiriamali vilivyotolewa na Rais.

Kauli hizo wamezitoa  leo Septemba 23/2020 wakihojiwa na Waandishi wa habari kwa nyakati tofauti tofauti ikiwa ni awamu ya pili tangia Vitambulisho hivyo vitolewe  huku wakitaka kuelezea mafanikio waliyoyapata na wanayoendelea kuyapata kupitia Vitambulisho hivyo.

Wakizungumza kwa nyakati tofauti tofauti, wamesema Vitambulisho hivyo  vimekuwa mkombozi kwao na Kumshukuru Mhe. Rais wa Jamhuri ya Muungano wa Tanzania , Dkt. John Pombe Magufuli ,kwa kuwajali wafanyabiashara wanyonge na kuwafanya  waweze kutambulika.

Akizungumza juu ya Vitambulisho hivyo, Mwenyekiti wa Wamachinga Manispaa ya Morogoro na Makamu Mwenyekiti wa  Jumuiya ya Wamachinga Tanzania (SHIUMA, Faustine Francis, amesema tangia  Vitambulisho hivyo vianze kutolewa vimekuwa na faida kubwa sana kwa Wamamchinga na Wajasiriamali wadogowadogo.

Aidha,amesema kuwa Vitambulisho hivyo vimemkomboa mjasiriamali mdogomdogo  kwani sasa wanaweza kufanyabiashara na kutengeneza faidia kubwa wakati huo huo wakichangia pato la Taifa katika kuleta maendeleo mengine kama vile miradi na huduma za jamii kupitia fedha hizo za Kodi ambazo wamekuwa wakitozwa za Shilingi elfu 20,000/= kwa mwaka .

 “Tunamshukuru sana Mhe. Rais wa Jamhuri ya Muungano wa Tanzania, Mhe. Dr John Pombe Magufuli, awali sisi Wamachinga tulikuwa na mateso ya kufanya biashara lakini kwa Umoja wetu kupitia Shirikisho la Umoja wa Wamachinga Tanzania (SHIUMA), tuliomba kupatiwa Vitambulisho ili na sisi tuweze kutambulika, tunamshukuru sana Mhe. Rais kwa kupokea maombi yetu baada ya Serikali yake kuwahimiza wafanyabiashara wadogo maarufu kama wamachinga kuchukua vitambulisho vya kufanyia biashara ili wafanya biashara zao bila bughudha na kuongeza pato la serikali, hivyo napenda kuchukua  fursa hii kwa niaba ya Umoja wa Wamachinga  Tanzania (SHIUMA) kuwaomba wale wafanyabiashara ndogondogo wote ambao hawajachukua vitambulisho vya kuwatambulisha kama wajasiriamali  wadogo ni muda sasa  wakachukue vitambulisho hivyo ili wafanye biashara zao kwa heshima bila kubughudhiwa”” Amesema Faustin.

Faustine, amechukua nafasi ya kumpongeza  Mhe. Rais Dkt: John pombe Magufuli kwa kujielekeza kujenga Miradi Mikubwa ya Kimkakati  Ukiwemo wa kufua Umeme wa Mto Rufiji maarufu kama Stiglers Gorge na Reli ya Mwendo kasi maarufu kama Standard Gauge na kwamba anaamini miradi hiyo itatoa ajira kubwa kwa wananchi.

Mwisho, Faustine, amewataka Wajasiriamali wote wadogowadogo ikiwamo Wamachinga kuwa waaminifu na kuheshimu Sheria zinazotolewa na Mamlaka ikiwa ni pamoja na kulipa kodi kwa Serikali.

Naye Mfanyabiashara Soko la Manzese Manispaa ya Morogoro, Nemes Mkiwa, amesema kwa sasa wanafanya biashara kwa uhuru mkubwa bila bughudhi ya aina yoyote kwani vitambulisho hivyo vimekuwa mkombozi kwao.

“”Awali tulikuwa tunalipa ushuru, ukiangalia katika ushuru huu ni fedha nyingi tulikuwa tunatumia na kushindwa kuendesha shughuli zetu lakini baada ya maombi yetu ya kupewa Vitambulisho na Mhe. Rais sasa tupo huru hatunyanyaswi na tunafanya biashara popote kwa kutumia kitambulisho hiki ambapo ni gharama nafuu ya shilingi elfu 20, lakini tumeokoa fedha nyingi ambazo tulikuwa tukitozwa kipindi cha nyuma na kusumbuliwa na Wagambo , tunaomba Vitambulisho hivi viendelee kwani vinatusaidia sana kutambulika kama miongoni mwa walipa kodi wachangiaji wa pato la Taifa”” Amesema Mkiwa.

Katika hatua nyingine, Ramadhani Rashid ambaye ni mfanyabiashara Manispaa ya Morogoro, amesema Kitambulisho hicho kimewasaidia sana hata wanaposafiri na kuonekana na mizigo yao nguo wanapoonesha Vitambulisho hivyo wanaachiwa kwa kuwa wan fursa ya Vitambulsiho.

Kwa upande wa Halima Ramadhani, amesema ni wakati wa Watanzania  wote kulipa kodi kwani miradi mingi imekuwa ikifanywa kwa kodi za Watanzania na kiasi ambacho Wajasiriamali wanalipa sio kikubwa ukilinganisha na tozo ndogondogo walizokuwa wakitozwa kipindi cha nyuma.

“”Tunalipa kiasi kidogo tu Shilingi 20000/= wala sio pesa kubwa sema unaiyoana kubwa ukilia kwa pamoja lakini ni fedha ndogo ambapo ukigawa kwa siku 365 utaona kila mmoja wetu analipia Senti 54 kwa mwaka ambapo kwa mwezi sawa na shilingi 600 , lakini zamani mtu unatozwa ushuru 200 kwa mwezi 6000 bado tozo nyengine wakati huo bado migambo hawajakuletea fujo, tunampongeza sana Mhe. Rais kwa Vitambulisho hivi ,ombi kwa Wajasiriamali wenzangu  tununue vitambulsiho hivi  ili tuweze kufanya biashara kwa uhuru na kuchangia pato la Taifa” Amesema Bi. Halima.

Katika awamu hii ya pili ya Vitambulisho vya Wajasiriamali , jumla  ya Vitambulisho 8662 vimeshauzwa kati ya Vitambulisho 13000 ambapo Manispaa ya Morogoro walipatiwa kwa ajili ya kuwauzia Wajasiriamali hao.