RC Sanare awataka wazazi wabanwe walipe gharama za chakula kwa watoto wao shuleni.

Wanafunzi wa Shule ya Msingi Kihonda Maghorofani wakiwa katika Foleni Chakula.

Mkurugenzi wa Manispaa ya Morogoro, Sheilla Lukuba, akitoa utambulisho kwa Mkuu wa Mkoa wa Morogoro, Mhe. Loata Sanare.

Walimu, Watendaji, Wenyeviti wa Mitaa pamoja na wajumbe wa Kamati ya Shule ya Msingi Kihonda Maghorofani wakimsikiliza kwa makini Mkuu wa Mkoa wa Morogoro, Mhe. Loata Sanare kwenye ziara ya kukagua maendeleo ya Shule hiyo.

Mkuu wa Wilaya ya Morogoro, Mhe. Regina Chonjo , akionja chakula cha Wanafunzi katika Shule ya Msingi Kihonda Maghorofani.

Mkuu wa Mkoa wa Morogoro, Mhe. Loata Sanare amesema Bado kuna changamoto kubwa ya wanafunzi kupatiwa chakula wakati wa masomo hali ambayo imechangia wanafunzi wengi kukatisha masomo, kufeli mithiani yao  na ongezeko la utoro .

Kufatia hali hiyo, RC Sanare amezitaka Kamati za Shule  kuwabana  Wazazi na walezi wa watoto wanaosoma  madarasa ya awali  na shule za msingi ili waweze kuchangia gharama za chakula cha watoto wao wakati wakiwa shuleni hivyo kuwasaidia wafanye vizuri kwenye masomo yao na kuondokana na madhara ya kiafya ikiwemo vidonda vya tumbo , utoro,  wizi na unyanyapaa.

Akizungumza na Kamati ya Shule pamoja na Waalimu, Kamati ya Wazazi katika Shule ya  Msingi Kihonda Maghorofani pamoja na Watendaji amesema kuwa Manispaa ya Morogoro, imebarikiwa  kuwa na chakula kingi lakini bado shule nyingi hazina huduma ya chakula shuleni hali ambayo inamkosesha mtoto haki ya msingi yakupata milo mitatu na hivyo kudhoofisha akili na mwili.

“Tubadilike wazazi hivi tunajisikia Amani watoto wetu wanashinda na njaa sisi tunakula , nafikiri wakati umefika sasa wa kuwasaidia hawa watoto kupata chakula mashuleni kwani ile Shea yake ambayo angekula akiwa nyumbani ndio atakayokula akiwa shuleni, tuache ubinafsi tuchangie chakula cha watoto wetu,”amesema RC Sanare.

Amesema kuwa  kama wapo wazazi wanaogoma kuchangia chakula wanakosea sana kwani haiwezikani mtoto ashinde bila kula chochote tangu asubuhi hadi anaporudi  nyumbani kwani hata makuzi ya mtoto  uwezo wa mtoto kuwa kiakili inategemeana  mlo kamili na vyakula mbalimbali vilevile ukuaji wa mwili kiafya ni muhimu watoto wapate chakula bora ili kujenga kiakili na kimwili.

Amezitaka kamati za  kukusanya chakula zishirikiane na kamati za wazazi kuhakikisha watoto wanapata chakula shuleni kwani Mkoa wa Morogoro una chakula kingi  ni aibu watoto kushinda bila kula.

Naye  Katibu Tawala wa Mkoa wa Morogoro, Mhandisi Emmanuel Kalobelo,  amesema tatizo la watoto kutokula shuleni linachangia kufeli kwa wanafunzi kwani wazazi wengi hawataki kuchangia gharamaya chakula cha Watoto wao hali ambayo inawafanya watoto wengi kukosa haki ya kupata chakula  wakati wa masomo ingawa wapo  baadhi ya wazazi ambao ujitoa na kuchangia gharama hizo.

"kukosekana chakula kunamuathiri mtotoanakuwa siyo msikivu ana kosa raha , pia inavuja morali ya kufundisha kwa mwalimu kwani huwezi kufundisha watoto wakiwa na njaa , hata ukitoa zoezi watoto hawatafanya  hivyo ni muhimu wazazi na viongozi wa shule wakae na kujadili namna ya kumsaidia mtoto kupata mlo shuleni kwani wapo wanafunzi wanaotoka kwenye familia maskini hivyo kutolewa kwa chakula shuleni kunawasaidia kupata japo milo miwili kwa siku hivyo kufanya vizuri kwenye masomo yao."amesema RAS Kalobelo.

Katika hatua nyengine, Mkuu wa Wilaya ya Morogoro, Mhe. Regina Chonjo, amesema  kutotolewa kwa  chakula mashuleni kunawanyima wanafunzi haki ya kusoma na kufanya  vizuri kwenye masomo kwani utakuta wanawaza  chakula badala ya masomo na kujisikia  vibaya pindi wakiwaona wenzao wanavyokula na wengine ujikuta vichwa vikiwauma kutokana na kutokula.

kwa upande wake Mstahiki Meya wa Manispaa ya Morogoro, mhe. Pascal Kihanga, amesema  pamoja na  jitihada mbalimbali zilizofanywa na uongozi wa shule hiyo kuwashawishi  wazazi watoe  pesa za chakula lakini wanagoma ni wazazi wachache ndio wanaona umuhimu na kulipia gharama hizo  nashindwa kuelewa sijui tatizo lipo wapi labda hali ya uchumi ni mbaya au mwamko  mdogo kwani ni 25% ya wanafunzi ndio wanaopata chakula shuleni.