MANISPAA YA MOROGORO YAUNGANA NA TASWO KUWAFARIJI NDUGU WA MAREHEMU WA AJALI YA MOTO MASAMVU.

Mstahiki Meya wa Manispaa ya Morogoro, mhe. Pascal Kihanga, akimkabidhi kiloba cha Unga mmoja ya ndugu wa marehemu waliyopata ajali ya moto Msamvu.

Mstahiki Meya wa Manispaa ya Morogoro, Mhe. Pascal Kihanga , akimkabidhi daftari kwa ndugu wa marehemu, (kulia), Diwani wa Kata ya Mwembesongo, Mhe. Ally Kalungwana.

Add caption

Mwenyekiti wa TASWO Taifa, Dr. Mariana Makuu, akizungumza na Ndugu wa Marehemu katika siku ya Maadhimisho ya Siku ya Ustawi wa Jamii Duniani, (kushoto) Afisa Ustawi wa Jamii Manispaa ya Morogoro, Sidina Mathias, Meya Manispaa ya Morogoro, mhe. Pascal Kihanga, (kulia), Diwani wa Kata ya Mwembesongo , Mhe. Allya Kalungwana.

Diwani wa Kata ya Mwembesongo, Mhe. Ally Kalungwana, akizungumza na Ndugu wa marehemu waliojitokeza katika maadhimisho ya Siku ya Ustawi wa Jamii Duniani yaliyofanyika Kitaifa Manispaa ya Morogoro, Kata ya Mwembesongo.

Afisa Ustawi wa Jamii Manispaa ya Morogoro, Sidina Mathias, akizungumza na Ndugu wa marehemu waliojitokeza katika maadhimisho ya Siku ya Ustawi wa Jamii Duniani yaliyofanyika Kitaifa Manispaa ya Morogoro, Kata ya Mwembesongo.

Mstahiki Meya wa  Manispaa ya Morogoro, Mhe. Pascal Kihanga, akizungumza na Ndugu wa marehemu waliojitokeza katika maadhimisho ya Siku ya Ustawi wa Jamii Duniani yaliyofanyika Kitaifa Manispaa ya Morogoro, Kata ya Mwembesongo.

Baadhi ya ndugu Ndugu wa marehemu waliojitokeza katika maadhimisho ya Siku ya Ustawi wa Jamii Duniani yaliyofanyika Kitaifa Manispaa ya Morogoro, Kata ya Mwembesongo.

 

MSTAHIKI Meya wa Manispaa ya Morogoro , Mhe. Pascal Kihanga, ameitaka Jamii itambue umuhimu wa kukuza mahusiano baina ya watu na watu ili kuchochea ukuaji wa kiuchumi hapa nchini.

Hayo ameyazungumza leo Machi 17,2020  katika Ofisi ya Kata ya Mwembesongo wakati wa hafla fupi ya Jumuiya ya Wataalamu wa Ustawi wa Jamii Tanzania (TASWO) kwa kushirikiana na Idara ya Ustawi wa Jamii Manispaa ya Morogoro  walivyotembelea wajane na tegemezi wa  marehemu waliofariki katika ajali ya  Moto Msamvu na kuwapatia msaada wa vyakula ikiwa ni moja ya maandalizi ya  maadhimisho ya siku ya Ustawi wa Jamii Duniani .

Akizungumza na Waandishi wa Habari, Mhe. Kihanga, amekipongeza  Chama hicho kwa jitihada za kuwajali tegemezi wa marehemu kwani wamefanya jambo la kiungwana linalostahili kuigwa na jamii kwa kuwakumbuka wajane wa wahanga wa ajali ya Moto Msamvu.

Aidha, amesema Jamii isiyokuwa na matatizo ya kijamii na migogoro ya nafsi kwa mtu mmoja mmoja ni kichocheo cha ukuaji wa uchumi katika nchi yoyote.

“Niwapongeza sana TASWO  Taifa kwa kuwajali ndugu zetu, kwani wengi wao wameacha wajane wakiwa na watoto hali hii imefanya familia zao ziwe tegemezi kwa kiasi Fulani, hivyo niseme kuwa upo uhusiano wa moja kwa moja kati ya ukuaji wa uchumi wanchi na utengamano wa Kijamii kwa wananchi wa chi husika, kamwe hatuwezi kutenganisha maendeleo ya kiuchumi  ,kisiasa, kitamaduni na Ustawi kwa jamii katika nchi kwani yote haya hutegemeana , na tukumbuke kwamba mahali ambapo Ustawi wa kweli wa Jamii haupo hata maendeleo ya kweli ya katika Nyanja zote huathirika na wakati mwengine kutokuwepo kabisa, hivyo TASWO mmetushika mkono kilichobakia Manispaa Ustawi wa Jamii pamoja na Viongozi wa Kata hii msisubirie mwaka kwa mwaka mjenge utaratibu wa kuwatembelea hawa ndugu zetu na kuwasaidia kile mlichonacho hata kama sio pesa hata ushauri wa nini wafanyaje itakuwa jambo la faraja sana kwao na kujisikia wanatahminiwa ”Amesema Mhe. Kihanga.

Pia , amesema Serikali imewatambua marehemu hao hadi kufikia kuwatengenezea uzio wao lakini na mpango uliopo kwa sasa ni kuwajengea makaburi ya pamoja yenye kufanana na kuweka mnara mkubwa utakao kuwa na majina yao warehemu wote ili iwe sehemu moja ya kuwakumbuka na ndugu wakiwa wanataka kuwaona itakuwepo sehemu kwa ajili ya dua kwa dini zote.

Amesisitiza huku akisema kuwa  kuwa ndugu wa marehemu wajenge utamaduni wa kuwaombea ndugu zao mara kwa mara na sio kusubiria kila mwaka kama Serikali ilivyojiwekea utaratibu wa kuwakumbuka.

Katika hatua nyengine, amesema maendeleo ya Ustawi wa Jamii ni muhimu sana kama ilivyo maendeleo katika Uchumi na hasa kwa sasa ambapo Taifa linafanya kila Jitihada ya kufikia malengo ya kuwa na uchumi wa kati na Viwanda ifikapo mwaka 2025, ambapo hayo yote yanaenda sambamba na kuhakikisha uhusiano wa Watu na Ustawi wa Jamii kwa ujumla upo katika hali ya kuridhisha .

Naye Mwenyekiti wa TWASO Taifa, Dr. Mariana Makuu, amesema katika kuunga mkono Juhudi zinazofanywa na Serikali ya Awamu ya Tano Chini ya Rais , Mhe. Dkt. John Magufuli , kwa kutambua umuhimu wa maadhimisho hayo wameona ni vyema wakawakumbuka wajane pamoja na tegemezi wa Marehemu waliofariki kwa ajali ya Moto Msamvu baada ya Lori la Mafuta kushika moto.

 Amesema tukio hilo litabakia kuwa la kihistoria hivyo wao kama TWASO kwa kushirikiana na Idara ya Ustawi wa Jamii Manispaa ya Morogoro, wameona ni vyema wakawakumbuka kwa kuwapatia vyakula , madaftari, peni , sabuni pamoja na mafuta ya kula ili waendelee kujikimu kimaisha katika kipindi kigumu wanachopitia.

Dr. Makuu amesema Wataalamu wa Ustawi wa Jamii wameendelea kubaki ni kichochoeo cha kuimarisha mahusiano ya  watu wote na hili wanalifanya katika maisha yao ya kila siku ya Kitaaluma na kazi na pale inapotokea mahusiano ya watu yana shaka au dosari basi kazi kubwa ya kufanya hafua ya kurejesha mahusiano hayo kwa sehemu kubwa huwa ni kazi ya Wataalamu wa Ustawi wa Jamii.

“Kila Mtanzania popote alipo anayo haki ya kupata huduma bora za Ustawi wa Jamii na kulinda Utu na heshima yake, heshima ya mtu mwingine ikiwa ni pamja na Heshima ya Taifa kwa ujumla, ambapo ndio maana hata Ilani ya Chama Tawala kinachoongoza Serikali yetu imeangalia kwa kina masuala ya Ustawi wa Jamii katika Ibara zake tofauti” Amesema Dr. Makuu.

Amesema kuwa katika kuadhimisha Sikuu hiyo ya Kitaifa, TASWO Morogoro imeona umuhimu wa kukuza mahusiano ya watoa huduma za Ustawi wa Jamii na wapokea huduma kwa kuzitegemeza baadhi ya familia ambazo ziliwapoteza ndugu wa karibu katika janga la mlipuko wa gari la mafuta ya Petroli lililotokea tarehe 10 Agosti 2019.

Amesema TASWO inatanguliza shukrani kwa wale walioonyesha utayari wa kuwaonga  mkono juhudi za maadhimisho ya Siku ya Ustawi wa Jamii Duniani (WORDL SOCIAL WORK DAY) iliyoadhimishwa Kitaifa Manispaa ya Morogoro ambapo maadhimisho hayo hufanyika duniani kote kila mwaka kuanzia wiki ya pili mpaka ya mwisho wa mwezi wa tatu ambapo kauli mbiu husema  ‘Umuhimu wa kukuza mahusiano ya Watu hasa katika kuleta mabadiliko”.

Hata hivyo ametoa pongezi kwa Mkurugenzi wa Manispa ya Morogoro, NMB, CBO  kwa kutoa msaada wa kufanikisha maandalizi hayo na siku yao ya kujumuika na ndugu wa maehemu katika kuwapatia misaada hiyo.

Kwa upande wa Afisa Ustawi  wa Jamii Manispaa ya Morogoro, Bi. Sidina Mathias,  akizungumza kwa niaba ya Mkurugenzi wa Manispaa ya Morogoro, amekishukuru Chama cha TASWO kwa moyo waliouonyesha kwani zipo sehemu nyingi zenye shida lakini wameona Manispaa ya Morogoro kuwa sehemu moja wapo ya kufanikisha siku hiyo ya Maadhimisho ya Siku ya Ustawi wa Jamii Duniani.

“Nawapongeza sana ndugu zetu wa TASWO ,hiki walichokionyesha kimetufariji sana , tunaomba ushirikiano huu wa Kitaaluma uendelee ili kuleta mafanikio chanya katika Nyanja mbalimbali hususani katika kuwasaidia watu ambao wamekosa faraja na tegemezi katika familia, sisi kama Manispaa kwa niaba ya Mkurugenzi wa Manispaa tunaungana kwa pamoja na hili lisiishie hapa hata katika maadhimisho mengine tuendelee kuwakumbuka watu wenye changamoto katika jamii na hata vile vituo vya kulelea Wazee na watu wanaoishi katika Mazingira  magumu na yatima” Amesema Sidina.

Diwani wa Kata ya Mwembesongo, Mhe. Ally Kalungwana, ameushukuru Ungozi wa TASWO kwa faraja walioinyesha wakishirikiana na Manispaa ya Morogoro kwani kitendo hicho kitaamsha hali ya ndugu wa marehemu kujiamini na kuona wana thamani sawa na watu wengine.

Lakini amewaonya wananchi  wa Manispaa ya Morogoro hususani wakazi wa Kata yake kuacha tabia ya kukimbilia vitu vyenye madhara wanapoona kuna dalaili hizo au kuna matuko yenye madhara yametokea kwani huatarisha maisha yao.

“Nichukue nafasi hii kuwaomba tena wananchi, pale mnapoona kuna madhara tafadhali msiyakimbilie badala yake ondoka eneo hilo haraka sana , tukiyakimbilia mwisho wa siku tunasababisha madhaara kama yaliyowakuta ndugu zetu, lakini nawashukuru sana TASWO na Idara ya Maendeleo ya Jamii  Manispaa ya Morogoro kwani zipo sehemu nyingi za kusaidia lakini wamekuja katika Kata yangu najisikia faraja sana “ Amesema Mhe. Kalungwana.