Waziri Jaffo aridhishwa na kazi za TARURA Manispaa ya Morogoro.

WAZIRI  wa Nchi Ofisi ya Rais-TAMISEMI Mhe. Selemani Jaffo, akikagua mfereji katika Barabara ya Arc Hotel.

Waziri Jaffo akizungumza na kutoa maelekezo katika mradi wa Ujenzi wa Soko Kuu la Kisasa .

Waziri Jaffo (kushoto) akiteta jambo na Afisa Utumishi wa Manispaa ya Morogoro, Waziri Kombo leo mara baada ya kumalizika kwa ziara ya kukagua Ujenzi wa Soko Kuu la Kisasa.

Waziri Jaffo akikaribishwa na Viongozi ,wa Mkoa wa Morogoro mara baada ya kuwasili katika Shule ya Sekondari Morogoro kukagua shule hiyo iliyokarabatiwa kwa fedha za Mhe. Rais za Ukarabati wa Shule Kongwe Nchini.

Waziri Jaffo akiwa pamoja katika picha ya kumbukumbu na wanafunzi wa Shule ya Sekondari Morogoro .

WAZIRI  wa Nchi Ofisi ya Rais-TAMISEMI Mhe. Selemani Jaffo ameipongeza Wakala wa Barabara za Vijijini na Mjini-TARURA Manispaa ya Morogoro  kwa kazi nzuri ya kusimamia ujenzi wa barabara pamoja na kutengeneza Culvert na mifereji bora yenye kuhimiri nguvu ya maji wakati wa mvua.

Mh. Jaffo ameyasema hayo leo Machi 13, 2020 alipokuwa akikagua miradi ya maendeleo inayotekelezwa katika Halmashauri ya Manispaa ya Morogoro ikiwemo miundombinu ya barabara zilizopo chini ya TARURA ambapo  Ujenzi wa barabara ya Arc Hotel ni moja ya barabara iliyotembelewa na Waziri Jaffo huku akiridhika na ujenzi wa mifereji kutokana na ubora na uimara .

Aidha, Waziri Jaffo ametoa angalizo kwa TARURA kuwa makini katika kuwasimamia wakandarasi wanaojenga barabara hizo ili ziendane na thamani halisi ya fedha inayotumika.

 “ Hizi barabara zetu tunazijenga kwa gharama kubwa, lakini baada ya miaka miwili tunaweka viraka, kwa hiyo ni mategemeo yangu barabara hii iwe na uhakika wa miaka 20 na wakandarasi tunaowapa kazi za ujenzi wa barabara wasiwe wababaishaji, na nawaagiza TARURA muwabane wakandarasi watutengenezee barabara zenye ubora lakini wahakikishe kwamba mifereji yote na culvert nazo mzijenge kama mlivyojenga katika barabara hii kwani hii mifereji ingekuwa dhaifu tungeshuhudia uharibifu mkubwa hapa yote kwa yote niwapongeze kwa kazi nzuri hamjawahi kuniangusha Manispaa ya Morogoro mnafanya kazi kwa maelekezo hongereni sana ”Amesema Jaffo.

Katika ziara yake hiyo, Mh. Waziri amewaagiza Meneja wa TARURA wote nchi nzima kuanzia wa Mikoani hadi Halmashauri kuhakikisha wanapitai mara kwa mara madaraja na kuyakagua ikiwamo kusafisha mifereeji inayozibwa kwa mrundikano wa mchanga na matope ili wakati wa mvua isilete madhara kwa wananchi na kuharibu miundombinu.

Kwa upande wa Meneja wa TARURA Manispaa ya Morogoro, Mhandisi James Mnene, amemshukuru Waziri Jaffo kwa pongezi na tamko lake la kutaka fedha zote za matengenezo ya kila siku za Barabara zitumike katika kuboresha miundombinu ya Mifereji , Culvert pamoja na  na madaraja  ili kuepusha madhara ya uharibifu wa miundombinu na madhahara kwa wananchi hususani katika kipindi cha Mvua.

Waziri wa Nchi OR-TAMISEMI Mh. Selemani Jaffo, alihitimisha ziara yake kwa  kwa kukagua ujenzi wa Shule ya Sekondari Morogoro baada ya kutembelea mradi wa Soko kuu la Kisasa linaloendela na Ujenzi katika Manispaa ya Morogoro Kata ya Mji Mkuu.