BUTABILE AJA NA SULUHISHO LA UONDOAJI WA TAKA KATA YA MAFIGA.

DIWANI wa Kata ya Mafiga Manispaa ya Morogoro, Mh.  Thomas Butabile amewataka wananchi kuwa wavumilivu kwa kuendelea kuhifadhi taka kwenye baketi huku wakisubiri Magari kutoka Manispaa.

Amesema hayo Novemba 13/2023 akiwa mtaa wa Mafiga "A" katika  mwendelezo wa  ziara yake ya kusikiliza ,kutatua kero za wananchi na kutoa mrejesho kwa kile ambacho serikali imefanya na amefanya tangu aingie madarakani.

Butabile amefafanua kuwa takataka  imekuwa changamoto kubwa Sana lakini kwa Sasa hivi wanaenda kuipatia muarobaini, kwa kuwa changamoto kubwa ilikuwa ni wananchi  kutolipa hela ya uzoaji taka na kupelekea watu kushindwana kwenye malipo, hivyo Manispaa wameamua kuzoa taka wenyewe ili kuhakikisha taka zinaondoka mitaani.

"Niwaombe  wananchi wakati tunasubiri Manispaa kuleta Magari kwa ajili ya uzoaji sisi tutaweka baketi kwa ajili ya kuhifadhi taka ili kuepuka na mripuko wa magonjwa"Amesema Butabile.

Mbali na hayo amewashukuru viongozi wote  wa Chama Cha Mapinduzi (CCM) kwa kuendelea kumuunga mkono na  kusimamia vizuri utekelezaji wa ilani ya Chama Cha Mapinduzi (CCM).