Mkurugenzi Manispaa Morogoro atekeleza agizo la Waziri Mkuu ujenzi wa makaburi ya waliofariki kwa ajali ya Moto.

Muonekano wa Uzio wa Makaburi ya walifariki kwa ajali ya Moto Morogoro kufuatia mlipuko wa Lori la Mafuta.

Mkurugenzi wa Manispaa ya Morogoro, Sheilla Lukuba, akikagua eneo ambalo litatumika kujenga Mnara wa marehemu.

Mkurugenzi wa Manispaa ya Morogoro, Sheilla Lukuba, akitoka katika uzio wa makaburi mara baada ya ukaguzi kumalizika. 

MKURUGENZI wa Manispaa ya Morogoro, Sheilla Lukuba, amesema tayari Manispaa ya Morogoro imeshachukua hatua za haraka za kutekeleza agizo la Waziri Mkuu wa Jamhuri ya Muungano wa Tanzania, Mhe. Kassim Mjaliwa , la ujenzi wa Makaburi pamoja na mnara kwa walifariki na ajali ya moto.

Kauli hiyo ameitoa leo Mei 14, 2020 ,mara baada ya kuzuru katika makaburi hayo kwa ajili ya kuangalia maendeleo ya ujenzi ,kufuatia kauli ya Waziri Mkuu wa Jamhuri ya Muuungano wa Tanzania , Mhe. Kassim Majaliwa kutaka makaburi na mnara yajengwe ili kuendelea kuwaenzi marahemu.

Aidha, Lukuba,  amemuagiza   Mhandisi wa Manispaa ya Morogoro, Juma Gwisu kwenda na kasi zaidi ya kukamilisha  ujenzi wa Makaburi  hayo pamoja na mnara.

“Huu ni utekelezaji wa agizo la Waziri Mkuu , Mhe. Kassim Majaliwa, alivyokuja Manispaa yetu  kutembelea makaburi kwa mara ya kwanza  ambapo aliagiza tuboreshe  na tuanze ujenzi wa makaburi pamoja na mnara mkubwa ambao utakuwa na majina yote ya marehemu kama moja ya njia za kuwaenzi, uzio tayari tumemaliza kujenga, Katibu Tawala wa Mkoa wa Morogoro , Eng. Emmanuel Kalobelo ameshatupatia fedha kupitia mfuko wa maafa zilizokusanywa kwa ajili ya marehemu hawa, kwahiyo ujenzi umeanza , kikubwa niwaombe ndugu, jamaa na marafiki wa marehemu wazidishe maombi wanapokwenda katika nyumba za ibada" Amesema Lukuba.

Hata hivyo,  amesema katika ujenzi huo , litatengwa eneo rasmi litakalo tumika kwa ajili kufanyia sala  na maombi  kwa marehemu wote  .

“Licha ya kuboresha makaburi lakini kutokana na uzito wa eneno, tumeona tutenge eneo la kufanyia sala na maombi, eneo hili dini zote watakaa na kila mtu ataomba kwa mujibu wa taratibu za  dini yake , nizidi kuwaomba ndugu  wa marehemu tuwe wavumilivu katika kipindi hiki kigumu, kuondokewa na ndugu zetu kusitufanye turudi nyuma kikubwa ni kuwaombea na kuendelea kufanya kazi kwa ajili ya familia zetu na maendeleo yetu tunatambua marehemu wameacha watoto, familia na tegemezi lakini yote ni mipango ya Mungu kila mtu atapitia njia hiyo muda na wakati ambao Mwenyezi Mungu atamuhitaji” Ameongeza Lukuba.

Lukuba, amesema mara baada ya ujenzi huo kukamilika , kutakuwa  na utaratibu wa maadhimisho ya kuwakumbuka na kuwaombea marehemu wote  kila mwezi wa 8, tarehe 10 ambapo ndipo tukio la ajali ya moto lilitokea.

Ikumbukwe kuwa, mkasa huo ulitokea majira ya saa mbili asubuhi ya Jumamosi baada ya lori lilibeba shehena ya petroli kuanguka katika mji wa Morogoro, na watu kuanza kuchota mafuta yaliyomwagika kisha mlipuko mkubwa kutokea.

Naye Mhandisi wa Manispaa ya Morogoro, Juma Gwisu, amesema ujenzi wote wa makaburi, fensi pamoja na mnara utagharimu kiasi cha shilingi Milioni 35 na mradi huo unatarajiwa kumalizika Juni 10,2020.