DC Chonjo aikabidhi Manispaa Morogoro Ambulance yenye thamani ya Shilingi milioni 45 iliyotolewa na Mbunge wa Jimbo la Morogoro Mjini, Mhe.Abood .

Mkuu wa Wilaya ya Morogoro, Mhe. Regina Chonjo, akikagua gari la kubebea wagonjwa lilokabidhiwa na Mbunge wa Jimbo la Morogoro Mjini, Mhe. Abdulaziz Abood kwa Wananchi wa Manispaa ya Morogoro ( kulia) ni Katibu wa Mbunge, Ndg. Mourice Masala akimuonesha gari hilo wakati wa ukaguzi.
Gari la kubebea wagonjwa lilokabidhiwa na Mbunge wa Jimbo la Morogoro Mjini, Mhe. Abdulaziz Abood kwa Wananchi wa Manispaa ya Morogoro.
Mkurugenzi wa Mnanispaa ya Morogoro, Sheilla Lukuba, akizungumza na kutoa pongezi za shukrani kwa Mbunge wa Jimbo la Morogoro Mjini, Mhe. Abdulaziz Abood, baada ya kupokea gari la kubebea wagonjwa. 
Kaimu Meya Manispaa ya Morogoro  na Diwani wa Kata ya Boma, Mhe. Amiri Nondo, akizungumza na waandishi wa habari na kuwasilisha salama za Mstahiki Meya na Baraza la Madiwani  katika hafla fupi ya makabidhiano ya gari la kubebea wagonjwa lililotolewa na Mbunge wa Jimbo la Morogoro Mjini, Mhe. Abdulaziz Abood.
Katibu wa Chama Cha Mapinduzi (CCM) , Wilaya ya Morogoro Mjini, Sofia Kibaba akitoa salamu za Chama na kumwakilisha  Mwenyekiti wa CCM  Wilaya kwenye makabidhiano ya gari la kubebea wagonjwa lililotolewa na Mbunge wa Jimbo la Morogoro Mjini, Mhe. Abdulaziz Abood.
Katibu wa  Mbunge, Ndg. Mourice Masala (kulia) akizungumza kwa niaba ya Mhe. Abood,  mbele ya Mgeni rasmi Mhe. Regina Chonjo, mara baada ya makabidhiano ya gari la wagonjwa.
Viongozi wakiwa katika picha ya pamoja.
Mkurugenzi Manispaa ya Morogoro, Sheilla Lukuba, akimkabidhi Mganga Mkuu wa Mnaispaa ya Morogoro, Dr Ikaji Rashid (katikati) vitakasa mikono vilivyotolewa na wadau kwa kwa ajili ya wananchi wa Manispaa ya Morogoro katika mapambano ya ugonjwa wa CORONA.

Mkurugenzi Manispaa ya Morogoro, Sheilla Lukuba, Mganga Mkuu wa Mnaispaa ya Morogoro, Dr Ikaji Rashid (kulia), Diwani wa Kata ya Sabasaba, Mhe. Shoo Shabani (kulia) akifuatiwa na Diwani wa Kata ya Boma, Mhe. Amiri Nondo wakikagua ratiba kabla ya tukio kuanza.
Diwani wa Kata ya Sabasaba, Mhe. Shoo Shabani (kulia) akimpokea na kumuonesha Mkurugenzi wa Manispaa ya Morogoro, Sheilla Lukuba, majaba ya kunawia maji yaliyotolewa na wadau kwa ajili ya kujikinga na CORONA.
Watumishi wa Manispaa ya Morogoro,wakiwa wamehudhuria katika  tukio la makabidhiano ya gari la kubebea wagonjwa . ( mbele) Afisa Utumishi wa Manispaa ya Morogoro , Shabani Duru, Afisa Ustawi Jamii Manispaa , Sidina Mathias na viongozi wengine wa Idara.

Mkurugenzi  Kinara For Youth Evolution (aliyeko nyuma ya Mkuu wa Wilaya ) akikabidhiano ya Majaba walioyoyatoa taasisi hiyo  ya kunawia maji kwa ajili ya kujikinga na ugonjwa wa Corona.

Mchungaji wa Kanisa la Faith Baptist Church lilopo Kola "B" , Mchungaji Jerry Max Wyatt (kulia) akikabidhi msaada wa Vitakasa mikono, Mkuu wa Wilaya ya Morogoro, Mhe. Regina Chonjo.

MKUU wa Wilaya ya Morogoro, Mhe. Regina Chonjo, amepokea Ambulance yenye thamani ya Shilingi milioni 45 kutoka kwa Mbunge wa Jimbo la Morogoro Mjini, Mhe. Abdulaziz Abood kwa ajili ya Wananchi wa  Manispaa ya Morogoro.

Tukio hilo la kukabidhi   gari la Wagonjwa (Ambulance) limefanyika leo Mei 18,2020 kwenye Kituo cha afya Sabasaba Manispaa ya Morogoro .

Akizungumza na Waandishi wa habari,amemshukuru Mbunge wa Jimbo la Morogoro Mjini, Mhe. Abdulaziz Abood , kwa kutekeleza ahadi ya kukabidhi gari la kubebea wagonjwa (Ambulance) kwa ajili ya wananchi wake wa Jimbo la  Morogoro Mjini ili waendelee kupata huduma bora pale wanapohitajika kupatiwa matibabu wanapokuwa na maradhi.

“ Nina mshukuru sana Mhe. Abood ,kwa kuwa pamoja na wananchi wake, niseme tu wabunge wengi wangekuwa wanatekeleza ahadi zao kwa wananchi na kuwa karibu na matatizo ya wananchi kama ilivyo kwa Mhe. Abood ,naamini tungefikia wakati wakuweka kikomo cha ubunge na tungesema hakuna tena kampeni za uchaguzi “ Amesema DC Chonjo.

DC Chonjo ,amesema kuwa Mhe. Abood amekuwa akijitolea kwa mambo mengi hususani katika kuwatatulia changamoto wananchi wa  Jimbo lake.

“ Tumeona hata katika risala iliyosomwa na Mganga Mkuu wa Manispaa ya Morogoro  ya ujenzi wa Duka la Dawa la Kituo cha afya sabasaba , amesema pesa ya kuunganisha umeme laki 5 atamalizia yeye licha ya kuwa anamuuguza mama yake Afrika Kusini , nimeongea nae asubuhi amesema kama kuna matatizo madogo madogo tumwambie atayafanyia kazi hapa inatudhihirisha ni kwa namna gani Mbunge wetu alivyo karibu na wananchi wake , ni wabunge wangapi wanaweza kujitolea pesa zao za mfukoni kwa ajili ya wananchi,naendelea kumpongeza sana Mwenyezi Mungu amlinde huko aliko na warudi salama hapa nchini” Ameongeza DC Chonjo.

Aidha amesema Mhe. Abood ,amekuwa akipambana sana katika mapambano ya Ugonjwa wa Corona hata ukiangalia katika maeneo mbali mbali ikiwemo masoko, mtaani na vijiwe vya bodaboda kote amegawa  ndoo za maji,sabuni,  barakoa na Vitakasa mikono kwa kutumia pesa zake binafsi na sio za mfuko wa Jimbo ambapo  hii yote ni kuonyesha anajali afya za wananchi wake.

Hata hivyo, amewaomba Wananchi wa  Jimbo la Morogoro waendelee kumuombea kwani sio rahisi mtu ana muuguza mzazi wake na yupo kwenye matatizo lakini anakumbuka ana jukumu jengine la kuendelea kuwahudumua wananchi wake japo mwenyewe hayupo.

Pia, amemuomba Mkurugenzi wa Manispaa ya Morogoro, kumkabidhi gari hilo la wagonjwa kijana ambaye ni makini na atakayechukulia gari hilo kama mali yake lenye kumpatia kipato na familia yake , ambapo anatakiwa atambue kwamba  anajukumu la kuitunza kwa kuwa gari hilo ni la gharama na linatumika katika kuokoa maisha ya watu.

Amesema  kuna madereva wengine  kwa sababu wanajua wanaweza kupita mahala popote kwa king’ora unakuta wajanja wakimrubuni kesho utasikia limekutwa Ulanga limebeba bangi kwani matukio haya ni kawaida na yanatokea , hivyo ameomba gari hilo lichungwe na kufanya kazi amabayo imekusudiwa kufanya kwa wananchi wa Manispaa ya Morogoro.

Katika hatua nyengine, amewapongeza wadau mbali mbali ikiwemo taaisis ya Kinara  For Youth Evulution pamoja na Kanisa la Faith Baptist Church lililopo Kola ‘B’ Kata ya Bigwa kwa kujitolea vifaa tiba vya kujikinga na Ugonjwa wa CORONA .

Hata hivyo,Kaimu Meya Manispaa Morogoro na Diwani Kata ya Boma, Mhe.Amiri Juma  Nondo, amesema kitendo alichofanya Mhe. Abood kimeonyesha kwamba ni jinsi gani anaguswa na matatizo ya wananchi.

“ Mbunge wetu amekuwa karibu sana na wananchi wake, mtu ambaye anatumia fedha zake za mfukoni badala ya kutumia na familia yake ana jinyima kwa ajili ya wananchi huyo ni kiongozi bora na sisi wana morogoro tunamuomba Mwenyezi Mungu  aweze kumponya na maradhi pamoja na mzazi wake warudi salama waendelee na majukumu ya kuwatumikia wananchi na Taifa kwa ujumla” Amesema Mhe. Nondo.

Naye Mkurugenzi wa Manispaa ya Morogoro , Sheilla Lukuba, amempongeza Mbunge wa Jimbo la Morogoro Mjini, Mhe. Abdulaziz Abood kwa msaada wa gari la wagonjwa huku akiahidi kulitunza na kuwahudumia wananchi kama ilivyokusudiwa.

Lukuba amesema gari hilo japo limetolewa katika Kituo cha afya cha sabasaba lakini litatumika katika kuwahudumia wananchi wote wa Manispaa ya Morogoro.

“ Tunampongeza sana Mbunge wetu, kwakweli ni wabunge wachache wenye uthubutu wa kutumia fedha zao za mfukoni ambazo wangeweza kula na familia , lakini ameona ni vyema akatoa sehemu ya pato lake kwa ajili  ya wananchi wake ili waweze kupata huduma bora pale wanapopatwa na maradhi, niwaombe watumishi na dereva atakayekabidhiwa gari hili mulitunze  , sio baada ya mwezi mmoja gari halitamaniki , tulitunze ili liendane sawa na lengo tarajiwa “ Amesema Lukuba.

Amesema kuwa,  kupatikana kwa gari la wagonjwa (Ambulance ) ambayo Mhe. Abood ameikabidhi kutatatua changamoto ya rufaa kwa wakina mama wajawazito na wagonjwa wengine.

Kwa upande wa Katibu  wa Mbunge ambaye ametumia nafasi ya kumwakilisha, Ndg. Mourice Masala, amesema Mhe. Abood amelitoa gari hilo kwa ajili ya Wananchi wa Manispaa ya Morogoro.

Amesema pamoja na kutambua chanagamoto katika sekta ya afya, ameona ni vyema akatumia fedha zake  kununua gari hilo lenye thamani ya shilingi milioni 45 liendeleee kutoa huduma kwa wananchi na kuokoa maisha ya watu pindi  wnapofikwa na maradhi.

“Mbunge wetu ,Mhe. Abood, amenituma nitoe salama zake na amesema gari hilo litumike kwa malengo yaliyokusudiwa, anatambua changamoto katika sekta ya afya, hata wakati wa risala ya mganga  Mkuu wa Manispaa ya Morogoro ya ujenzi wa duka la dawa,  niliwasilianan nae akasema kama kuna chanagmoto ndogondogo tumwambie na amesikia kwamba kuna dua la dawa linajengwa hivyo ameahidi kutoa kiasi cha shilingi  laki 5 kwa ajili ya gharama za kuingiza umeme” Amesema Mourice.

Mganga Mkuu wa Manispaa ya Morogoro, Dr Rashidi Ikaji, amesema Kituo cha afya cha sabasaba kinawahudumia wananchi 12,821 ambapo kiuhalisia kituo hicho kinawahudumia wakazi wa ndani na nje ya Manispaa ikiwemo Wilaya za Jirani kama Morogoro Vijijini na Mvomero.

Amesema kabla ya kuwepo kwa gari hilo, kituo kilikuwa kikipata changamoto kubwa ya usafiri wa kuwawahisha wateja wa rufaa kwa wakati katika Hospitali ya Mkoa hali ambayo ilikuwa inapelekea wakati mwengine wakina mama kukosa watoto.

‘”Tuna mshukuru sana   Mbunge wetu Mhe. Abood kwa msaada huu, matuamaini yetu kwamba gari hili litasaidia kupunguza vifo vya wakina mama na watoto wachanga kama si kumaliza kabisa tatizo hili, tunampongeza sana kwa jitihada zake za kuwajali wanawake na wapiga kura wake kwa ujumla” Amesema Dr. Ikaji.