DC CHONJO APOKEA VIFAA VYA KUJIKINGA NA CORONA KUTOKA KAMPUNI YA TAZAMA PIPELINE LIMITED VYENYE THAMANI YA SHILINGI MILIONI 4,800,000/=

Mkuu wa Wilaya ya Morogoro, Mhe. Regina Chonjo, akipokea vifaa kinga kwa ajili ya kujikinga na ugonjwza wa CORONA kutoka kwa Afisa Utumishi wa TAZAMA Pipeline Limited Msemwa Deogratius (kulia). (kushoto ya DC ni Mstahiki Meya wa Manispaa ya Morogoro , Mhe. Pascal Kihanga, (kushoto) Mkurugenzi wa Manispaa ya Morogoro Sheilla Lukuba.

Mkuu wa Wilaya ya Morogoro, Mhe. Regina Chonjo,akimkabidhi vifaa tiba Katibu Tawala wa Wilaya ya Morogoro, Bi. Ruth John (kushoto kwake). 

Mkuu wa Wilaya ya Morogoro, Mhe. Regina Chonjo,akimkabidhi vifaa tiba  Mstahiki Meya Manispaa ya Morogoro, Mhe. Pascal Kihanga.

MKUU wa Wilaya ya Morogoro, Mhe. Regina Chonjo, amepokea vifaa vya kunawia mikono vyenye thamani ya Shilingi 4,800,000/= vikiwamo stendi za kuwekea ndoo za kunawia mikono 8, mashine ya kupima joto 5 , Barakoa  pamoja na Vitakasa mikono pamoja na sabuni kutoka  Kampuni ya Tanzania na Zambia ya kusafirisha mafuta kutoka Tanzania kwenda Zambia (TAZAMA Pipeline Limited kwa lengo la kuwasaidia wananchi kujikinga na maambukizi ya homa ya mapafu inayosababishwa na Virusi vya COVID 19 (Corona).

Tukio hilo la kukabidhi vifaa tiba kutoka TAZAMA Pipeline Limited limefanyika leo Mei 29, 2020 nje ya Ofisi ya Mkuu wa Wilaya ya Morogoro.

Vifaa hivyo vya kujikinga na maambukizi ya Virusi vya Corona vimepokelewa na Mkuu wa Wilaa hiyo Mhe. Regina Chonjo,akiwa ameambatana na Mkurugenzi wa Manispaa ya Morogoro, Sheilla Lukuba, , Mganga Mkuu wa Manispaa ya Morogoro Dr Ikaji Rashid e pamoja na Katibu Tawala Bi Ruth John.

Akizungumza wakati wakupokea vifaa hivyo,  Mhe. Chonjo,  amesema kuwa Wilaya ya Morogoro  imepokea vifaa hivyo na kwamba wataendelea kuhamasisha wadau wengine waweze kuchangia ili kuendelea kudhibiti ugonjwa huo usisambae kwenye maeneo mengine.

Chonjo, amefafanua  kuwa Virusi vya Corona vimekuwa  janga kubwa Duniani na kwamba Wilaya hiyo imejipanga kuhakikisha kuwa kila mmoja anatumia vitakasa hivyo ili kujikinga na maambukizi ya Virusi hivyo pasipo kuambukiza wengine.

“Kama mkuu wa Wilaya ninashukuru kwa msaada huu, kwetu, tutakuwa huru kwa kuendelea kutoa huduma kwa wananchi kama kawaida, ndio mana mmeona hapa kila anaeingia ana nawamikono yake kabla ya kuingia kupatiwa huduma” amesema Mhe. Chonjo.

” kwetu sisi hatupambani kama Morogoro , tunapambana kama mkoa ,nandio jukumu tulilopewa , hivyo hivyo nitumie fursa hii kuwaalika wadau wengine wenye mapenzi mema kutupatia vifaa vingine” Ameongeza DC Chonjo.

Aidha, ameeleza kuwa Wilaya hiyo imejipanga vizuri katika kupambana na virusi vya Corona ikiwemo kuendelea kutoa matangazo ya kuhamasisha na kuelimisha wananchi namna ya kujikinga na maambukizi ya virusi hivyo.

Kwa upande wa Mstahiki Meya wa Manispaa ya Morogoro, Mhe. Pascal Kihanga, amesema kuwa kutokana na suala la korona kuhusisha maisha ya watu ni vema kila mmoja akautambua vizuri ugonjwa wa korona na kutoa elimu ya tahadhari katika familia, nyumba za ibada kama vile makanisani na misikitini huku akiendelea kusistiza kuwa suala la taarifa mbalimbali pamoja na matamko dhidi ya korona yatakuwa yakitolewa na viongozi ili kutoleta taharuki katika ya jamii.

“Niombe Mkurugenzi wa Manispaa ya Morogoro na timu yake ya Wataalamu , hivi vifaa ni vya kisasa ukilinganisha na tulivyokuwa tukivipata siku za nyuma, hivyo elimu inahitajika mahali popote vitakavyowekwa ili visije kutumika vibaya , tumeona utumiaji ni rahisi sana lakini lazima watu tuwaelekeze na ninaamini watu ni waelewa wakielekezwa watavitumia vizuri” Amesema Mhe. Kihanga.

Akisisitiza tahadhari dhidi ya korona Mkurugenzi wa Manispaa ya Morogoro, Sheilla Lukuba amesema kwa kuwa kuambukizwa kwa virusi vya korona ni mawasiliano ya mtu na mtu kwa kubebaba virusi hivyo  jambo kubwa na la msingi ni kila mmoja kujitenga kwa maana ya kujiepusha na mikusanyiko isiyo ya lazima jambo litakalosaidia kuepusha maambukizi ya gonjwa hili ambapo amesema kinga ni bora kuliko tiba na kwamba gonjwa la korona halina tiba hivyo ni vema kuepuka maeneo ambayo ni hatarishi kwani litasaidia kuwa salama na kuepuka maambukizi.

Naye Mganga Mkuu wa Manispaa ya Morogoro, Dr Ikaji Rashid, amesema njia ya kujikinga na ugonjwa huo ni kwa  njia ya kuosha mikono vizuri kwa maji safi na sabuni, kutumia vikinga pua na mdomo (masks)na uso, kuzingatia walau umbali wa futi 6 kutoka kwa mgonjwa mwenye korona, Hakuna chanjo mpaka sasa ambapo amesema kirusi cha korona katika mwili wa binadamu huchukua siku 2 mpaka 14(wastani siku 5) kwa binadamu kuanza kuonesha dalili baada ya kuambukizwa na virusi vya koron pia huambukizwa kwa njia ya matone yatokanayo kwa kukohoa au kugusana moja kwa moj lakini pia kuepuka kusalimiana kwa mikono.

Kwaupande wake Afisa Utumishi wa   Tanzania kwenda Zambia (TAZAMA Pipeline Limited,    Msemwa Deogratius,amesema wameamua kutoa misaada hiyo katika taaisis za Serikali na Vituo vya afya kwa ajili ya kuunga mkono jitihada zinazofanywa na Serikali katika kupambana na Ugonjwa wa CORONA.

‘”Misaada hii tumeielekeza katika maeneo yote ambayo Bomba letu liempita, tumeanzia Kigamboni, Tunduma na maeneo mengine, na vifaa hivi tiba vitawasaidia wananchi ikiwa ni hatua ya kujikinga na virusi hivyo vya homa ya mapafu inayosababishwa na Covid 19’’ Amesema Msemwa.

Hata hivyo amesema zoezi hilo pia lilifanyika katika Nchi ya Zambia ambapo walianzia Wilaya ya Kinondoni na watamalizia katika Wilaya ya Tunduma.