KAMATI NDOGO YA MAZINGIRA MANISPAA YA MOROGORO YATAKA WANANCHI KUWAJIBIKA KATIKA USAFI WA MAZINGIRA.BELE A KUWEKA MJI SAFI.

KAMATI ndogo ya Mazingira Manispaa ya Morogoro imewataka  watendaji wa Kata na Mitaa, wananchi pamoja na  wadau mbalimbali wa utunzaji wa mazingira kuhakikisha Mazingira ya Manispaa yanakuwa safi na kutunzwa muda wote.

Kauli hiyo, imetolewa na Mwenyekiti wa Kamati hiyo ambaye ni Diwani wa Kata ya Kihonda, Mhe. Hamisi Kilongo  Julai 12/2023 katika ziara ya Kamati hiyo ya kutembelea Kata ya Mafiga na Mbuyuni kuangalia maeneo ambayo yanawadhabuni wa taka na yale ambayo Kata husika wanatumia vikundi vyao vya ndani vya uzoaji wa taka.

"Tulikuwa na ndugu zetu Kampuni ya uzoaji taka Kajenjere na sasa hawapo tena tunatarajia kupata wakandarasi  wapya wa usafi,  Kata ambazo zimeona zinauwezo wa kufanya kazi hiyo wenyewe wajipange vizuri sana, na wale watakaopata wakandarasi  tutawasimamia watimize wajibu, kwahiyo ni niwajibu wa viongozi kusimamia suala la usafi wa mazingira, pia wananchi na  wadau wa mazingira lazima wawajibike katika utunzaji wa mazingira ili kuliweka Mji wetu wa Manispaa  katika hali ya usafi"Amesema Mhe. Kilongo.

"Mji wetu upo katikati, tuna miradi mikubwa sana ya kimkakati, ndoto yetu ni kuwa Jiji, hatuwezi kuwa Jiji kama Mji wetu utakuwa mchafu , tujipange sawasawa , tuhakikishe tunatunza mazingira ili iwe kama njia ya kuishukuru Serikali yetu ya Awamu ya Sita chini ya Rais wetu Dkt. Samia Suluhu Hassan,  kwa maendeleo waliyotufanyia”Ameongeza Mhe. Kilongo.

Kwa upande wa Mjumbe wa Kamati hiyo ambaye pia ni Diwani wa Kata ya Mbuyuni, Mhe. Samwel Msuya, amesema Kata yake wamejipanga vizuri kuhakikisha Kata hiyo inakuwa safi kwa kutumia vikundi vya ndani vya uzoaji wa taka.

Naye Diwani wa Kata ya Mafiga, Mhe. Thomas Butabile, amesema Kata yake inauwezo wa kuweka mikakati ya usafishaji hivyo hawana haja ya kuwa na Mkandarasi wa usafi.