DIWANI KILAKALA AIPONGEZA MORUWASA KUTATUA KERO YA MUDA MREFU BONG'OLA.

DIWANI wa Kata ya Kilakala Mhe. Marco Kanga, ameipongeza MORUWASA kwa kutatua Kero ya muda mrefu ya Upatikanaji wa Maji Bong'ola.

Pongezi hiyo ameitoa  leo Julai 17/2021, wakati wa Ziara ya kukagua mradi huo.

Akizungumza na baadhi ya Wananchi wa Mtaa wa Bong'ola, Mhe. Kanga, amesema suala la Maji kwa Mtaa wa Bong'ola limekuwa ni kilio Cha muda mrefu hivyo pongezi kubwa ziende kwa MORUWASA kwa kusikia kilio Cha Wananchi.

" MORUWASA tuwapongeze Sana, kwakweli wametufuta machozi, Bong'ola mnakila sababu ya kutembea kifua mbele, tumetoka katika maji tunaelekeza nguvu Sasa katika miradi mingine ikiwemo ya afya, barabara na Soko ili Wananchi wetu waweze kupata huduma bora" Amesema Kanga.

Kwa upande wa Wananchi wa Mtaa wa Bong'ola wamemshukuru Diwani wa Kata hiyo kwa jitihada zake za kuiletea Maendeleo Kata hiyo.

"Diwani wetu anafanya kazi kubwa, tuna miaka zaidi ya 5 kilio chetu ni maji, tunamshukuru Sana  licha ya maji lakini amekuwa mstari wa mbele katika kuona Kilakala inaendelea " Amesema Mwanaidi .

Licha ya kumpongeza Diwani lakini pia Wananchi hao wamepongeza jitihada zilizofanywa na  MORUWASA kwani Sasa suala la Maji kwao limebakia historia.