ZAIDI YA SHILINGI MILIONI 722 ZATUMIKA KUNUNULIA MAGARI YA TAKATAKA MANISPAA YA MOROGORO.

Mkuu wa Wilaya ya Morogoro Mhe. Bakari Msulwa, (aliyevaa suti nyeusi)  akikata utepe kuzindua rasmi magari yaliyonunuliwa na Manispaa ya Morogoro pamoja na Magari ya usafishaji wa Mji kutoka  Kampuni ya Kajenjere iliyopata dhabuni ya kufanya kazi hiyo, (kulia ) Mkurugenzi  wa Manispaa ya Morogoro Sheilla Lukuba., Afisa Maendeleo ya Jamii Manispaa ya Morogoro, Enedy Mwanakatwe, Afisa Elimu Sekondari Manispaa ya Morogoro, Dr Janeth Barongo,Afisa utumishi Manispaa ya Morogoro Waziri Kombo.

Mkuu wa Wilaya ya Morogoro, Mhe. Bakari Msulwa, akitesti mitambo wakati wa kukaguaa magari ya kisasa ya kufanya usafi yaliyonunuliwa na Manispaa ya Morogoro.

Afisa Mazingira Manispaa ya Morogoro , Samweli Subi, (kushoto) akisoma taarifa ya ununuzi wa magari ya taka na taswira ya hali ya usafi Manispaa ya Morogoro mbele ya Mkuu wa Wilaya.

Mkuu wa Wilaya ya Morogoro, Mhe. Bakari Msulwa , katika picha ya pamoja na baadhi ya wafanyakazi wa kampuni ya Kajenjere akipokea taarifa fupi kutoka kwa Mwakilishi wa Kmapuni hiyo.

Wafanyakazi wa Kampuni ya  Kajenjere wakiwa tayari kwa kazi za usafishaji wa Mji.

Magari ya kuzoela taka (Compactor) yakiwa eneo ambalo yatakuwa yana kaa baada ya shughuli za uzoaji wa taka kumalizika. Eneo hilo lipo jira na Ofisi ya Kata ya Mji Mkuu.

MKUU wa Wilaya ya Morogoro, Mhe. Bakari Msulwa, amezindua magari manne (4) ya kubebea takataka yenye thamani ya Shilingi milioni 722,890,731/= yaliyonunuliwa na Manispaa ya Morogoro kwa ajili ya kuweka Mji safi.

Zoezi hilo la uzinduzi wa magari hayo limefanyika katika viwanja vya Ofisi ndogo za Manispaa  ya Morogoro ambapo hutumika katika kuhifadhia magari (Yard) leo Julai 01, 2020.

Akizungumza na Waandishi wa habari, amesema hiyo ni hatua kubwa ambayo sasa itakwenda kusaidia kuondoa na kumaliza changamoto ya kuzagaa kwa takataka mitaani na kuziingiza Dampo.

Sambamba na uzinduzi wa Magari hayo ya taka lakini tukio hilo limeambatana na mapokezi ya Magari ya kuzolea takataka (Compactor 5) na gari la kisasa la kusafisha barabara, kunyonya mchanga pamoja na  kusafisha barabara kwa maji (Sweeper Loader) kutoka Kampuni ya Kajenjere.

Licha ya ununuzi wa magari hayo,  DC Msulwa, ameipongeza Manispaa ya Morogoro kwa kufanikiwa kuingia mkataba na kampuni ya Kajenjere  wa kufanya usafi katika kata 12 za Manispaa ya Morogoro kwa kuwa Kampuni ya Kajenjere  ina vifaa na magari ya kisasa, ambayo anaamini yatafanikisha lengo la kuweka Mji kuwa safi.

Kikubwa ameomba Wananchi watoe ushirikiano na washiriki katika kufanya  usafi katika maeoneo yao na kulipa ada ya uzoaji wa taka ili kuwezesha shughuli hiyo kufanyika kwa ufanisi mkubwa katika kuepukana na magojwa ya milipuko.

Mkurugenzi wa Manispaa ya Morogoro, Sheilla Lukuba, ameshukuru Mhe. Rais Dkt John Pombe Magufuli kwa kuipatia Manispaa ya Morogoro Shilingi Milioni 722, 890,731/= za kununulia magari manne ya taka.

Kwa upande wa Afisa Mazingira Manispaa ya Morogoro, Samweli Subi,amesema kuwa Manispaa ya Morogoro imedhamiria kufanya usafi na kuwa mfano wa kuigwa miongoni mwa Halmashauri za  mkoa wa Morogoro hadi ngazi ya Taifa.

Subi, amesema  kuwa kwa sasa kampuni ya Kajenjere itaanza kazi ya usafi katika kata za Mji Mkuu, Mafiga, Sabasaba, Kingo, Mwembesongo, Mji Mpya, Kilakala, Kichangani,Mafisa,K. Ndege, U/Taifa, pamoja na Kihonda Maghorofani.

Aidha, amesema kuwa, kiasi cha taka zinazozalishwa kwa siku ni tani 231 na uwezo wa kuzoa taka kuzipeleka dampo ni asilimia 79 sawa na tani 180.

Amesema zoezi la usafishaji wa mji linakabiriwa na changamoto ya ongezeko la biashara ndogondogo katika maeneo yasiyo rasmi ambapo biashara hizo zinapelekea utupwaji wa taka hovyo ikiwamo kandokando ya barabara , kwenye mifereji ya maji ya mvua, maeneo ya wazi, majengo ambayo hayajakamilika kujengwa pamoja na maeneo ambayo viwanja havijaendelezwa.

‘Tumeamua kutafuta mdhabuni mwenye uwezo wa kuwa na magari ya kutoa huduma ya usafi katika Kata 12 na masoko 4 yenye uzalishaji mkubwa wa taka na tumevipa  vikundi vya usafi kwenye Kata 17 zenye uzalishaji mdogo wa taka, changamoto kubwa iliyotufanya tutafute mdhabuni  ni  baada ya kuona vikundi vyetu vya taka havina uwezo wa kuwa na magari ya taka na kupeleka taka kutoondolewa kwenye makazi na maeneo ya biashara kwa wakati na kusababisha kero kwa wananchi na na baadhi ya wnaanchi kutolipa ada kwa wakati, ” Amesema Subi.

Naye Msimamizi wa ukusanyaji wa takataka kutoka Kampuni ya Kajenjere, Oswini Mwaitete, amesema lengo la kampuni yao ni kuhakikisha Manispaa ya Morogoro  inakuwa safi akiamini kuwa baada ya miezi michache wananchi wataanza kuona utofauti.

Mwaitete, amesema kuwa Kampuni yao wana vifaa vya kisasa ikiwamo gari la kisasa la kusafisha barabara, kunyonya mchanga na hata kusafisha barabara kwa maji.