DC MSULWA ATAKA MAONESHO YA NANE NANE YAWASAIDIE WAKULIMA NA WAFUGAJI ILI KUONGEZA TIJA KATIKA SHUGHULI ZA UZALISHAJI.

Mkuu wa Wilaya ya Morogoro, Mhe. Bakari  Msulwa (aliyevaa kofia ya Tanzania), akipata maelezo kutoka kwa Afisa Kilimo Manispaa ya Morogoro, Michael Waluse, (aliyevaa suti ya kijivu) wakati wa ziara ya kukagua Shamba darasa la Manispaa ya Morogoro katika kuelekea sikukuu ya maonesho ya Nane nane . (aliyevaa gauni la kijani) Mkurugenzi wa Mnaispaa ya Morogoro, Sheilla Lukuba.

Ukaguzi wa Asili ya Milima ya Uluguru.

Ukaguzi wa Bustani ya Jikoni ambayo inatumia mabaki ya vyakula .
Zao la Red Cabbage linalostawishwa katika Shamba darasa.

Ukaguzi wa Kilimo cha Greenhouse ambapo kumestawishwa nyana pamoja na Pilipili hoho.

Kilimo cha Mpunga.

MKUU wa Wilaya ya Morogoro, Mhe. Bakari Msulwa, ameziomba Halmashauri zote mbili Morogoro Vijijini pamoja na Manispaa ya Morogoro kuhakikisha kwamba  Maonesho ya Kilimo na Mifugo (Nane Nane) katika Wilaya ya Morogoro  yanawasaidia  wakulima, wafugaji na wavuvi kwa kiasi ili kuwawezesha kubadili shughuli zao na kuzifanya kuwa na tija inayoridhisha.

Hayo ameyazungumza leo Julai 07, 2020, wakati wa ziara ya kukagua na kutembelea  vipando vya Shamba darasa la Manispaa ya Morogoro pamoja na Halmashauri ya Wilaya ya  Morogoro ikiwa ni kuangalia namna ya maandalizi yanavyoendelea katika kuelekea katika maadhimisho hayo ya Kanda ya Mashariki yanayotarajiwa kuanza Agosti 1-8,2020 Mkoani Morogoro.

Akizungumza na waandishi wa habari, DC Msulwa, amesema  Maonesho ya Nane Nane yamekuwepo kwa miaka mingi maeneo mbalimbali ya nchi katika Kanda mbalimbali na ukiyatembelea utakutana na vitu vya kuvutia sana hususani Teknolojia na mbinu bora za uzalishaji kilimo na mifugo ambazo zinauwezo wa kuleta tija kubwa lakini bado changamoto kubwa mambo yote bora na mazuri yanayopatikana kwenye Maonesho bado hayajaweza kumfikia mkulima kwenye ngazi za msingi.

Amesema , kuwa   unaweza kwenda maeneo ya wakulima wenyewe ukashangaa kukuta mkulima analima kilimo cha kienyeji ambacho hakina manufaa.

 “Teknolojia inayooneshwa kwenye Maonesho haya bado haijaweza kuwafikia wakulima na wafugaji wetu kwenye vijiji vyao wanapoendeshea shughuli zao za kilimo na mifugo, lakini teknolojia na ubunifu unaopatikana kwenye Maonesho haya unahitaji kuwafikia wakulima wa chini kabisa, maana tusijekuwa tunaandaa maonehso haya kwa ajili ya tabaka la watu wenye nacho tukawasahau wale wa hali ya chini ambao ndio wanaojihusisha na kilimo na kuendesha maisha yao" Amesema DC Msulwa .

 Aidha, ametoa wito  kwa Mamlaka zinazohusika kuhakikisha Mashamba darasa yote ya halmashauri zote mbili vinakuwa vituo vya  kudumu na wakati wote wataalamu wa kilimo na mifugo wawepo kituoni hapo kipindi chote cha mwaka wakisimamia shughuli za kilimo na mifugo kituoni hapo na Halmashauri zote  zilete Wakulima na Wafugaji wao kujifunza na kupata suluhisho la changamoto zinazowakabili katika shughuli zao za uzalishaji .

Hata hivyo, ameziagiza Halmashauri zote mbili ,kwa kushirikiana na wadau mbalimbali wanaounga mkono shughuli za kilimo, mifugo na uvuvi waone namna wanavyoweza kuifikisha kwa wakulima na wafugaji wetu elimu inayopatikana kwenye Shamba darasa .

 Mwisho,  amewaomba  wananchi ndani ya Wilaya ya Morogoro na nje ya Wilaya  hususani wakulima, wafugaji na wavuvi kutembelea Maonesho hayo kwa wingi katika Shamba darasa ya Wilaya ya ,Morogoro  kwa kuwa mambo mazuri yakujifunza yapo mengi kubwa likiwa jinsi Teknolojia na mbinu bora za kuongeza tija ya uzalishaji mazao ya kilimo na mifugo.

Naye Mkurugenzi wa Manispaa ya Morogoro, Sheilla Lukuba, amewataka waangalizi wa Shamba darasa kutumia muda ulipo kukimbiza na na maandalizi ili waweze kufanya vizuri katika ngazi ya Kanda ya Mashariki.

“Niwaombe Maafisa Mifugo na Kilimo ngazi zote waongeze nguvu na waangalie maeneo haya kwa jicho la tatu, muda sio rafiki sana , tuna wiki 3 za maandalizi, tuhakikishe kila kinachotakiwa kimefanyika , Maonesho haya yapo ndani ya Manispa yetu na Wilaya yetu hatuna sababu za kufeli, naamni tukishirkiana kitimu na tukaongeza ubunifu tutashinda vigezo vyote vipo ndani ya uwezo wetu”Amesema Lukuba.

Kwa upande wa Afisa Kilimo Manispaa  ya Morogoro, Michael Waluse, amesema maandalizi yanaendelea vizuri ambapo washiriki wakuu ni pamoja na wakulima, wawakilishi wa wakala wa makapuni ya pembejeo, wawakilishi wa wasindikaji wa mazo mbalimbali, wawakilishi wa kampuni za umwagiliaji, wawakilishi wa kampuni za dhana za kilimo pamoja na Idara mbalimbali za Halmashauri ya Manispaa ya Morogoro.

Aidha, amesema miongoni mwa bidhaa zitakadhooneshwa ndani ya banda ni pamoja na mazao mbalimbali yanayozalishwa na wakulima, bidhaa mbalimbali zinazosindikwa na wakulima na wadau, shughuli za vyama vya Ushirika, shughuli za mawakala wa kampuni za pembejeo, shughuli mbalimbali za Idara za Halamshauri, shughuli mbalimbali za vikundi vya Vijana na Wakina mama, shughuli za kongano la nguo na shughuli za wazalishaji wa miche ya maua na matunda.