WAWEZESHAJI WA VIKUNDI VYA KIJAMII (CCI) WAGAWA VIFAA VYA KUJIKINGA NA CORONA SHULE ZA MANISPAA YA MOROGORO.

Wanafunzi wa Shule za Msingi Azimio A na B Kata ya Kihonda  Manispaa ya Morogoro ,  wakionesha furaha baada ya kukabidhiwa majaba ya maji na sabuni kwa ajili ya kujikinga na Ugonjwa wa CORONA.

Wanakikundi wa Kihonda kutoka Federation wakiwa na Viongozi wa CCI katika picha ya pamoja katika Shule ya Msingi Kiegea Kata ya Kihonda mara baada ya kumaliza zoezi la ugawaji wa Majaba na sabuni shuleni. 

UONGOZI wa  Shirika lisilo la serikali la Uwezeshaji wa Vikundi vya Kijamii (Tanzania Urban Poor Federation-TUPF)  kupitia  Center For Community Initiatives (CCI)  wamegawa vifaa tiba ikiwamo  Majaba 10 yenye ujazo wa lita 60 kila moja  na sabuni za kunawia mikono kwenye  baadhi ya Shule za Msingi  Manispaa ya Morogoro ikiwa ni moja ya kurudisha gawio kwa  jamii .

Zoezi hilo la ugawaji wa vifaa hivyo vya kujikinga na Ugonjwa wa CORONA,limefanyika leo Julai 14,2020 katika Shule 3 za Msingi Manispaa ya Morogoro ikiwamo Shule ya Msingi Kihonda Majaba 3, Shule za Msingi Azimio A na B Majaba 5 , pamoja na Shule ya Msingi Kiegea Majaba 2.

Akizungumza na Waandishi wa habari, Mratibu wa Tafiti Jamii Kitaifa katika Kaya Masikini (TANZANIA URBAN POOR FEDERATION- TUPF), ambaye pia ni Katibu wa Jukwaa la kuwawezesha Wanawake  kiuchumi Mkoa wa Dar Es Salaam, Bi. Husna Seif Shechonge, amesema lengo la kutembelea Shule hizo ni pamoja na kugawa vifaa vya kujikinga na Corona  na kuangalia changamoto za wanafunzi hususani suala la Vyoo.

“Tunajua CORONA imepita kutokana na maombi ya Watanzania na jinsi Mhe. Rais wetu Dkt John Pombe Magufuli ,alivyo tutoa hofu, lakini kupitia ugonjwa huo tumejifunza kwamba kunawa mikono kuna refusha maisha na ni msaada mkubwa kwa  afya  zetu, kwahiyo tumewaletea watoto vifaa hivi kuendelea kurithisha watoto wetu utamaduni wa kunawa mikono  licha ya kutokuwepo na ugonjwa  tuna kila sababu ya kuendelea kufuata  maelekezo na kuzingatia ushauri wa Wataalamu wetu wa afya pamoja na Viongozi wetu wa Juu katika kujikinga na ugonjwa huu wa CORONA  “Amesema Shechonge.

Licha ya kugawa vifaa vya CORONA  lakini lengo jengine ni kujifunza na kuona changamoto zinazowakabili wanafunzi shuleni hususani suala la Vyoo wanavyovitumia shuleni kama ni rafiki kwao.

Shechonge, amesema baada ya kuona hali ya vyoo katika Shule walizotembelea , amesema changamoto wamezibeba kama shirika na kuziwasilisha katika ngazi ya Kitaifa kupitia FEDERATION  ili kuona ni kwa namna gani wanaweza kuzifanyia  kazi kwani asilimia kubwa ya shule wanafunzi ni wengi matundu ya Choo ni machache.

Naye mthamini na mfuatiliaji  shughuli za  Center For Community Initiatives  (CCI), Stella Stephen, amesema kitendo cha kusaidia vifaa vya kujikinga na CORONA vinatoa mwanya kwa Serikali  kuzitumia fedha zilizo katika bajeti ya kununua vifaa tiba na kuziingiza katika matumizi mengine.

Stella, amesema kama elimu ya kunawa mikono itajengewa utamaduni kwa Watanzania wote na watoto shuleni wakielewa zaidi , Tanzania itatengeneza kizazi bora chenye kujua usafi na usalama wa afya katika ustawi wa Jamii na kupelekea Jamii kuishi  katika maisha bora .

Kwa upande wa Mratibu wa FEDERATION Manispaa ya Morogoro ambaye pia ni Katibu wa Jukwaa la Uwezeshaji wa Kiuchumi Wanawake Manispaa ya Morogoro , Bi Edina Hamisi, amesema licha ya ugawaji wa ndoo lakini wamekuwa wakijihusisha sana na Ujenzi wa Vyoo kwa Jamii ambapo  mwaka 2010 walifanikiwa kujenga jumla ya Vyoo 100 katika Kata 4 Manispaa ya Morogoro kupitia Center For Community Initiatives  na ushirikiano wa Manispaa ya Morogoro  chini ya Mkurugenzi  Simbei ambaye ndiye aliyekuwa Mkurugenzi wa Manispaa ya Morogoro.

Licha ya Ujenzi wa Vyoo lakini walifanikiwa kuingiza Maji katika Kata 3 Manispa aya Morogoro ambapo jumla ya watu 80 waliweza kuhudumiwa  na kunufaika na mradi huo wa maji.

“Yapo mengi CCI inafanya lakini kwa hili la kupata ugeni kutoka CCI na wana Federation  ni moja ya kitendo cha kumuunga Mkono Mhe. Rais Dkt John Pombe Magufuli ya kupambana na Ugonjwa wa Corona, ndoo hizi zitawekwa vyooni  ili wanafunzi wanapotoka chooni wanawe mikono na ndoo nyengine zitawekwa kwenye maeneo ya kuingilia wanafunzi ili wanapotoka nyumbani wananawa na kuingia shuleni , tunashukuru sana Uongozi wa Manispaa ya  Morogoro kupitia Mkurugenzi  Sheilla Lukuba kwa kutukarimu sana ndani ya Manispaa yake, Uongozi wa Shule , Uongozi wa Kata ya Kihonda kupitia Afisa afya, Wanavikundi vya jamii pamoja na Wanafunzi  kwani zoezi letu limeenda vizuri na tunaamini yale tuliyoyaona kama Shirika tuna yabeba na kwenda kuangalia jinsi ya kuyafanyia kazi “ Amesema Bi. Edina.

Upande wa Kaimu Afisa afya  Manispaa ya Morogoro, Nobert Bilaba, ameupongeza Uongozi wa CCI na FEDERATION kwa kuiungua mkono Manispaa ya Morogoro kwa upande wa Shule katika kupambana na ugonjwa wa CORONA.

“”Tunawashukuru sana, huu ugonjwa unaua, kwa kitendo mlichokifanya mmetusaidia kuwalinda wanafunzi wetu na waalimu wao, sisi Manispaa tunapambana sana na ugonjwa huu na shule zetu zipo salama tumekuwa wafuatiliaji sana wa kutoa maelekezo , lakini niwaombe wanafunzi  mmepewa vifaa hivi ambavyo vimetumia gharama kubwa kununuliwa , mvitunze ili viweze kuendelea kuwasaidia na mnapotoka chooni hakikisheni mnanawa mikono, sio kuepuka na CORONA pekee bali hata magonjwa ya milipuko kama vile Homa ya kuhara pamoja na kipindupindu” Amesema Bilaba.