KAMATI YA SIASA CCM KATA YA TUNGI WAKOSHWA NA UTENDAJI WA MKURUGENZI MANISPAA YA MOROGORO.

Katibu wa Chama Cha Mapinduzi CCM Kata ya Tungi, Zulfa Mkuya akitoa pongezi kwa Mkurugenzi wa Manispaa ya Morogoro juu ya utendaji wake katika utoaji wa huduma kwa Wananchi.

KAMATI ya Siasa ya Chama Cha Mapinduzi  Kata ya Tungi  imepongeza Mkurugenzi  wa Manispaa ya Morogoro , Sheilla Lukuba anavyojitoa katika kuleta maendeleo kwa Wananchi wa Manispaa ya Morogoro hususani Kata ya Tungi.

Pongezi hizo zimetolewa na Katibu wa Chama Cha Mapinduzi (CCM)  Kata ya Tungi, Zulfa Mkuya, kwa niaba ya  Mwenyekiti wa CCM Kata ya Tungi , kwenye hafla fupi ya uzinduzi wa Choo cha Mfano cha Mtoto wa Kike Shule ya Sekondari Tubuyu.

Akizitoa pongezi hizo, amesema Mkurugenzi wa Manispaa ya Morogoro ameonesha uzalendo katika kuhakikisha ilani ya Uchaguzi ya mwaka 2015 hadi 2020, inatekelezwa kwa vitendo kwa kutumia makusanyo yao ya Ndani, Fedha kutoka Serikli kuu pamoja na Fedha kutoka kwa wadau wa maendeleo.

‘” Manispaa ya Morogoro hususani Mkurugenzi wetu kwakweli anaitendea  haki ilani ya uchaguzi ya CCM kwa mwaka 2015-2020, miradi iliyotekelezwa Manispaa yetu kwa kushirikiana na Baraza la Madiwani ni mfano wa kuigwa na itakuwa alama na  taswira inayoonekana kwa Wananchi.tunashuhudia mifereji na sehemu korofi za barabara ndani ya Kata yetu ikifanyiwa kazi, tumeona leo Magari ya kubebea  takataka kufanya Mji safi na sasa uzinduzi wa Choo hiki cha mfano tunaamini yapo mengi yanakuja kwetu kikubwa tuendelee  kumpa ushirikiano , ametuahidi kuwa  barabara yetu ya Tungi kuanzia Julai ya mwaka huu  muda na wakati wowote itatengenezwa kwa kiwango cha lami hili ni jambo jema litakalowasaidia Wanafunzi na wananchi kupata urahisi wa usafiri tunajivunia kuwa na Kiongozi mchapakazi kama huyu Dada yangu Lukuba  " Amesema Mkuya.

Aidha,  amebainisha kuwa thamani halisi ya fedha imeonekana Katika miradi hiyo kwani mbali na kutumia fedha za ndani, Serikali kuu na wadau, lakini pia  kiasi kinachotumika katika ukamilishaji wake vinaenda sambamba na ubora .

Mbali na ujenzi wa barabara , amesema Kata ya Tungi imepokea fedha za miradi sio chini ya Milioni 80 mpaka sasa , ambapo katika ujenzi wa Shule ya Msingi Tubuyu mpaka sasa jumla la madarasa 3 yamekamilika na madarasa mawili yananyanyuliwa, milioni 17 zimetolewa kwa ajili ya mradi wa Zahanati ya Tubuyu ambayo tayari hatua ya uwekaji wa madirisha umefanyika, shilingi milioni 56 zimetolewa kwa ajili ya mradi wa uchomaji wa nyama Choma katika mnada wa Ngómbe ambapo ujenzi huo umeanza rasmi jana Juni 30, 2020 ambapo ifikapo maonyesho ya Nanenane wananchi waweze kupata huduma hiyo.

Mwisho amewaomba wananchi wa Manispaa ya Morogoro, Kata ya Tungi kuweza kuwachagua Viongozi wanaotokana na Chama Cha Mapinduzi watakaopewa ridhaa ya kuwakilisha katika Uchaguzi wa Oktoba mwaka 2020 ikiwamo kura za Mhe. Rais, Wabunge na Madiwani pamoja na Madiwani wa Viti Maalum.