MKURUGENZI MANISPAA MOROGORO AFUFUA MATUMAINI YA UJENZI WA SHULE MPYA YA MSINGI KATA YA MZINGA.

Wananchi wakinyoosha vidole kuashiria kuridhika na maamuzi ya upatikanaji wa eneo la Ujenzi wa Shule mpya ya Msingi Kata ya Mzinga.

Afisa Elimu Msingi Manispaa ya Morogoro Bi Chausiku Masegenya  (watatu kutoka kulia) akioneshwa mpaka wa Msitu na Makaburi ambapo kunatarajiwa kujengwa Shule ya Msingi.  

Viongozi wakiwa katika picha ya pamoja na Wananchi mara baada ya kumalizika kwa sintofahamu ya juu ya mmiliki aliyedaiwa kumiliki eneo la Msitu mdogo uliopo Kata ya Mzinga Mtaa wa Kidangawa maarufu kama Kongwa.

Afisa Tarafa Manispaa ya Morogoro, Winfred Kipako, akizungumza na Wananchi katika Mkutano wa kujadili upitishwaji wa eneo la  Ujenzi wa Shule ya Msingi Kata ya Mzing.

aliyekuwa Diwani wa Kata ya Mzinga, Mhe. Milikieli Mahiku , akizungumza na Wananchi katika Mkutano .

Mwenyekiti wa Mila na Desturi Mkoa wa Morogoro Ramadhani Divu Nyagale akizungumza na Wananchi katika Mkutano.

Mwenyekiti wa CCM Kata ya Mzinga , Ndg Erick Mshana, akizungumza na Wananchi.

Wananchi wakipata vinywaji mara baada ya kumalizika kwa Mkutano.

MKURUGENZI Manispaa ya Morogoro Sheilla Lukuba, amemuagiza Afisa Elimu Msingi Manispaa ya Morogoro, kusimamia kikamilifu wananchi wa Kata ya Mzinga kuunda Kamati ya Ujenzi wa Shule mpya ya Msingi ambapo ilikuwa ni kero kubwa katika Kata hiyo.

Kauli hiyo ameitoa leo Julai13,2020  kufuatia kumalizika kwa sintofahamu ya juu ya mmiliki aliyedaiwa kumiliki eneo la Msitu mdogo uliopo Kata ya Mzinga Mtaa wa Kidangawa maarufu kama Kongwa.

Akizungumza na Waandishi wa habari, amesema Kata ya Mzinga ni miongoni mwa Kata 29 zilizopo Manispaa ya Morogoro ambayo haina shule hata moja huku watoto wakisoma katika Kata jirani ambazo zipo mbali na makazi yao.

Lukuba, amesema mgogoro huo umemalizika  leo  muda na wakati wowote wakazi wa Kata ya Mzinga wajiandae na mradi wa ujenzi wa Shule mpya ya Misngi ambayo itaingia katika historia yao na kusogeza karibu huduma ya shule kwa Watoto.

“”Nawashukuru sana Afisa elimu Msingi Manispaa ya Morogoro , Afisa Tarafa Manispaa ya Morogoro , wataalamu wa Misitu ,Viongozi wa kimila Mkoa na Wilaya, Viongozi wa Kata, aliyekuwa Diwani wa Kata ya Mzinga pamoja na Wananchi kwa kukubali kauli moja ya kujenga shule, Kata hii bado ipo nyuma huduma za Shule, leo tumekubaliana , nimemuagiza  Afisa Elimu alisimamie hili ili kamati ya Ujenzi ianzishwe mara moja na waanze kwa utaratibu wa kuhamasishana  wenyewe katika uchangiaji wa fedha za Ujenzi kwa kuwa eneo lipo tayari  , na sisi katika Bajeti yetu ya mwaka wa fedha ujao wa 2021/2022 tuitengee Bajeti ili watoto wasome karibu na makazi yao” Amesema Lukuba.

Hata hivyo, Afisa Elimu Msingi Manispaa ya Morogoro,Bi Chausiku Masegenya, amewashukuru Wananchi kwa kufanya maamuzi yenye tija kwa ajili ya maendeleo ya Watoto na vizazi vijavyo.

“”Nimekuja kumwakilisha Mkurugenzi, lakini nimefurahi sana maamuzi haya, nitaongea na Mhandisi wa Manispaa afike katika eneo hili aangalie eneo kisha awaelekeze jinsi ya kufanya ili wakazi hawa waanze mara moja usafi na waandae  kamati za ujenzi na uhamasishaji kwa ajili ya kuchangia fedha, wakionesha  nia nzuri sisi katika vikao vyetu vya kibajeti tutawasilisha ili tupate fedha za kuendelea na ujenzi , ningependa mwakani wanafunzi wasiandikishwe Kauzeni waandikishwe kwenye Shule yetu mpya najua Mkurugenzi wangu mpambanaji ana amelifufua hili tutafanikiwa kwa asilimia 100 ””Amesema Bi Chausiku.

Kwa upande wa Afisa Tarafa Manispaa ya Morogoro, Winfred Kipako , akizungumza kabla ya kumkaribisha  Afisa Elimu Msingi kuzungumza na Wananchi hao, amesema sula la elimu linatakiwa kupewa uzito wa hali ya juu katika kujikomboa na kujinasau na umasikini.

Kipako, amesema haiwezekani mtu mmoja akawa juu ya wenzake kwa kupinga maendeleo ya elimu.

Naye aliyekuwa Diwani wa Kata ya Mzinga,  Mhe. Milikieli Mahiku , amewapongeza Wananchi wa Kata ya Mzinga kwa maamuzi yenye uthubutu huku akitoa ahadi ya mifuko 30 ya Saruji katika kuchangia Ujenzi wa Shule hiyo ya Msingi .

“Sijatoa ahadi hii kama kampeni,nimetoa ahadi hii kwa kufurahishwa na maamuzi ya wananchi hawa, ni muda mrefu suala la shule tulikuwa tunalihitaji lakini leo jambo limekaa mahala pake lazima nimfurahie zile jitihada ambazo awali tulizitaka zitokee, nieleweke kwamba sitogombea tena Udiwani, nitaangalia nafasi nyengine zaidi ya kugombea  lakini nitahakikisha nashiriki nao kwa kila jambo wananchi wa Kata hii hata kama sitakuwa kiongozi bado nitakuwa nao bega kwa bega nikiwa mwananchi wa kawaida” Amesema Mhe. Milikieli.

Mwenyekiti wa Mila na Desturi Mkoa wa Morogoro Ramadhani Divu Nyagale ,amesema mila hazikatazwi lakini lazima kutengwe eneo kwa ajili ya kuanza ujenzi wa Shule ambapo mara baada ya kukamilika itawarahisishia wanafunzi kupata elimu bora pasina mateso wanayoyapata sasa kutokana na ukosefu wa shule ya serikali ya Msingi na Sekondari katika Kata nzima ya Mzinga.

Naye Shabani Matunda, ambaye  ni wakazi wa Mtaa wa Kidangawa Kata ya Mzinga amemuomba Mkurugenzi wa Manispaa  kutilia mkazo swala la upatikanaji wa Shule huku akimpongeza Afisa Elimu Msingi Manispaa ya Morogoro Bi. Chausiku Masegenya akimwakilisha Mkurugenzi  kwa kuzuru katika eneo hilo lililokuwa na utata kwani ameonyesha uwezo wa kujali wananchi anaowaongoza.

 Katika ziara hiyo ,  Afisa Elimu Msingi,ameambatana na Afisa Tarafa Manispaa ya Morogoro Winfred Kipako, Mtaalamu idara ya misitu Manispaa ya Morogoro, Viongozi wa Chama Cha Mapinduzi wa Kata , Mwenyekiti wa Mila na Desturi Mkoa wa Morogoro Ramadhani Divu Nyagale, Mwenyekiti wa Baraza la Ardhi na maridhiano Kata ya Mkindo  Wilaya ya Mvomero, Diwani Mstaafu Kata ya Mzinga, Mhe. Milikieli Mahiku, Wenyeviti wa Mitaa, Mtendaji na Wananchi wa Kata ya Mzinga.

Ili kufanikisha Ujenzi wa Shule hiyo , aliyekuwa Diwani wa Kata ya Mzinga, Mhe. Mhe. Milikieli Mahiku aliahidi mifuko 30 ya Saruji, Mtendaji wa Kata ya Mzinga Jerry Kiwelo ameahidi mifuko 10, na Mwenyekiti wa CCM Kata ya Mzinga , Ndg Erick Mshana ameahidi mifuko 5 na kufanya jumla ya ahadi kutimia mifuko 45 ya Simenti.