WALUSE ATUNDIKA DALUGA, AAGA RASMI BARAZA LA MADIWANI MANISPAA YA MOROGORO,

AFISA Kilimo Manispaa ya Morogoro , Michael Waluse, ameliaga rasmi Baraza la Madiwani huku akisema muda wa kustaafu umefika.

Kauli hiyo ya kuwaaga Madiwani pamoja na Wakuu wa Idara na Vitengo, ameitoa leo Oktoba 25/2022 katika Baraza la kuwasilisha taarifa za Kata lililofanyika Ukumbi wa Kilakala Soko Kuu la Chifu Kingalu Morogoro.

Akizungumza katika Baraza hilo huku akikaimu nafasi ya Mkurugenzi katika Baraza hilo, Waluse, amewashukuru Watumishi wote pamoja na wananchi wa Manispaa ya Morogoro, Viongozi wa Chama na Serikali kwa ushirikiano waliompa katika kutimiza majukumu yake.

"Nawashukuru Watumishi wenzangu, Viongozi wa Chama na Serikali, na wadau wa kilimo ndani ya Manispaa yetu ,nachukua nafasi hii kuwaaga naenda kustaafu kazi, kama kuna watu niliwakosea naomba wanisamehe na mimi nimewasamehe, utumishi wa Umma sio uadui, tuliobakia tufanye kazi kwa kushirikiana na kwa upendo mkubwa ili kumsaidia kazi Rais wetu na kuwatumikia wananchi kwa kutoa huduma bora" Amesema Waluse.

Mwisho, amewatakia majukumu mema wataalamu wote wa Kilimo Manispaa ya Morogoro huku akisema kama watahitaji nguvu na maarifa yake yupo tayari kuonesha ushirikiano lengo ikiwa ni kukuza sekta ya Kilimo Manispaa na Taifa kwa ujumla.