MADIWANI MANISPAA YA MOROGORO WATAKIWA KUBUNI VYANZO VIPYA VYA MAPATO.

 

Waheshimiwa Madiwani wa Manispaa ya Morogoro baada wakiwa katika picha ya pamoja baaada ya kula kiapo katika uzinduzi wa Baraza Jipya leo.

Katibu Tawala Mkoa wa Morogoro, Eng. Emmanuel Kalobelo, akitoa salamu za Mkuu wa Mkoa wa Morogoro wakati wa kuzindua Baraza jipya la Madiwani Manispaa ya Morogoro.

Mkuu wa Wilaya ya Morogoro, Mhe. Bakari Msulwa, akihutubia Madiwani pamoja na Wananchi waliojitokeza katika uzinduzi wa Baraza Jipya la Madiwani.

Mbunge wa Jimbo la Morogoro Mjini, Mhe. Abdulaziz Abood, akitoa salamu .

Mbunge wa Viti Maalum, Dkt. Christine Ishengoma akitoa salamu .

Mwenyekiti wa CCM Wilaya ya Morogoro Mjini, Fikiri Juma ,akitoa salamu za Chama .

Mkurugenzi wa Manispaa ya Morogoro, Sheilla Lukuba, (kushoto) , wakiteta jambo na Katibu Tawala Wilaya ya Morogoro, Ruth John, katika Ukumbi wa Msamvu wakati wa Uzinduzi wa Baraza Jipya la Madiwani 2020/2025.

Mstahiki Meya wa Manispaa ya Morogoro, Mhe. Pascal Kihanga, akitoa shukrani mara baada ya kukamilika kwa zoezi la kula kiapo pamoja na uzinduzi wa Baraza jipya la Madiwani.

Aliyekuwa Mgombea nafasi ya Mstahiki Meya wa Manispaa ya Morogoro, Mhe. Seif Chomoka, akitoa neno la shukrani mara baada ya kuhitimisha uzinduzi wa Baraza jipya la Madiwani.

KATIBU Tawala Mkoa wa Morogoro, Mhandisi Emmanuel Kalobelo, amewataka Madiwani wa Halmashauri ya Manispaa ya Morogoro kubuni vyanzo vipya vya mapato na kuboresha vyanzo vilivyopo ili kuwezesha Halmashauri kuweza kuongeza uwezo wa kujitegemea kwa mapato ya ndani ya halmashauri.

 

Kalobelo, ameyasema leo wakati wa Uzinduzi wa Baraza la Madiwani leo Desemba 14,2020 katika Ukumbi wa Mikutano uliopo Stendi ya Mabasi Msavu.

Amesema kuwa Halmashauri ikiboresha mapato itasaidia halmashauri kutoa huduma za jamii  kwa wananchi ikiwemo afya, elimu, Maji nk na  pia kiwango cha mikopo kwa vikundi vya vijana na wanawake itaongezeka.

 

Hata hivyo, amewataka Waheshimiwa Madiwani kutenga maeneo ya  uwekezaji kwa ajili ya  viwanda vidogo, kati na vikubwa kufanya hivyo kutaongeza Mapato ya  halmashauri na Serikali kuu.

Hata hivyo,  amesema kuwa ukusanyaji  wa mapato ya ndani lazima uendane na nidhamu ya matumizi ya fedha kwa hiyo ni jukumu  la Baraza la Madiwani kusimamia na kuhakikisha kuwa mapato yote yanayokusanywa katika vyanzo vya ndani yanatumika ipasavyo.

“”Nitoe rai kwa Manispaa kwamba hakikisheni fedha zinazokusanywa kupitia katika miradi yote zisitumike zikiwa mbichi, bali zinatakiwa kupelekewa benki na kutumika kwa kufuata utaratibu mzuri na uliosahohi kisheria lakini fedha hizi za miradi ziende Benki kwa wakati, “ Amesema Eng. Kalobelo.

Katika hatua nyengine, amewataka Viongozi kuendelea kuhamasisha Wananchi kujiunga na Bima ya afya ya CHF iliyoboreshwa huku Serikali ikiwa na kazi ya kuhakikisha kwamba Dawa na vifaa tiba vinapatikana kwa uhakika ili kuendelea kuboresha afya  na Ustawi wa  Wananchi.

Ufuatiliaji wa mara  kwa mara ufanyike ili kuhakikisha miradi ya maendeleo  inatekelezwa na lazima Waheshimiwa Madiwani utaratibu wa kukagua miradi hiyo inayotekelezwa na Halmashauri kupitia kamati  zako.

“ Nipongeze Baraza la Madiwani kwa kweli mmefanya vizuri sana katika kipindi cha miaka 5 iliyopita , sasa tunataka uwepo wa Baraza Jipya uwe chachu kubwa ya maendeleo, tutawapima baada ya miaka 5, yapo maendeleo mmeyakuta, tunataka muyaendeleze na kuanzisha upya, lakini tusisahau wafanyabiashara kuwajengea mazingira mazuri, lazima tuhakikishe kwamba tunajenga kituo cha One Stop Centre kwa ajili ya wafanyabiashara wote” Ameongeza Eng. Kalobelo.

 

Mwisho, amewataka Madiwani wahakikishe kwamba wanakamilisha Ujenzi wa vyumba 26 vya Ujenzi wa Madarasa  mapya  na Madawati yake kabla ya mwezi Februari mwakani  ili Wanafunzi wapate kukaa na kusoma vizuri.

Naye Mkuu wa Wilaya ya Morogoro, Mhe. Bakari Msulwa, amewapongeza Manispaa ya Morogoro kwa ufaulu wa Wanafunzi Kidato cha kwanza ambapo kwa Manispaa Jumla ya Wanafunzi 7,577 wamefaulu kujiunga na Kidato cha kwanza.

Amesema kazi iliyopo mbeleni ni kuhakikisha wanatekeleza agizo la Waziri Mkuu wa Jamhuri ya Muungano wa Tanzania, Mhe. Kassim Majaliwa, la kuhakikisha hadi kufikia mwisho wa mwezi wa Februari , mwakani Wanafunzi wote waliochaguliwa kuingia kidato cha kwanza wanaanza masomo wakiwa Madarasani wakiwa wamekalia Madawati yao.

Msulwa, amesema darasa moja linajumla ya thamani ya Shilingi Milioni 20, hivyo Manispaa itahitaji kutumia Shilingi Milioni 520 kujenga madarasa mapya 26 bila kujumuisha ukamilishaji wa Maboma na samani zake.

 

“ Ndugu zangu , leo mmekula viapo na mmezindua Baraza jipya , katika agizo hili tuna siku 74, za kujenga Majengo 26 mapya na kumalizia  maboma 13 ambapo madarasa hayo yanatakiwa kukamilika na watoto wawe madarasani, hili ni agizo la Serikali ya CCM ambao wote hapa ni Wanachama wake hivyo halina mjadala, niwasihi Waheshimiwa Madiwani, tusianze vibaya kwa kushindwa kutekeleza agizo hili rasmi la Serikali Kuu, kila siku lazima tulifanyie kazi , Mkurugenzi na Madiwani tusikae kimya angalia kama kwenye Kata yako kuna Sekondari, licha ya fedha za Manispaa, lakini tumeandaa utaratibu mzuri wa kukusanya michango kutoka kwa wadau wetu mbalimbali wa maendeleo ili tuhakikishe zoezi hili , peke yetu hatuwezi , ni lazima tushirikiane na Wadau wetu “ Amesema DC Msulwa.

“Nawaomba sana Waheshimiwa Madiwani tumpe ushirikiano Mkurugenzi wa Manispaa yetu, katika kipindi kifupi nilichofanya naye kazi nimegundua kuwa mkishikamana naye kasi yetu ya Maendeleo itaongezeka sana, mimi naamini mkitumia  uwezo wake na kujiepusha na migongano isiyo na tija, Morogoro itaingia katika hadhi ya Jiji ikiwa mpya kabisa, Hongereni sana Manispaa, chapeni kazi, “ Ameongeza DC Msulwa.

Kwa upande wa Katibu Tawala Wilaya ya Morogoro, Ruth John, amewataka madiwani hao kuwa na umoja na mshikamano  katika kutatua  changamoto mbalimbali zinazowasilishwa kwao kutoka kwa wananchi ili kuweza kuzitatua na kuzijadili kwa pamoja.

Ruth,  amewataka madiwani wa kata zote za jimbo hilo kufanya kazi kwa ushirikiano ili kuleta Maendeleo katika jimbo hilo kwa kushirikiana vyema na Uongozi wa Manispaa.

Naye Mbunge wa Jimbo la Morogoro Mjini, Abdulaziz Abood, amesema atafanya kazi bila ubaguzi wowote hivyo ameomba madiwani wote kumuunga mkono katika harakati za kuleta Maendeleo Jimbo la Morogoro Mjini.

"Tufanye kazi kwa pamoja, mimi siko upande wa mtu yeyote! Bali nahusiana na watu wote kikubwa ni kuleta Maendeleo ndani ya Halmashauri yetu ya Manispaa ya Morogoro na tuvunje makundi kinachotakiwa ni kwenda kuitekeleza Ilani ya Chama Cha Mapinduzi CCM kwa vitendo kama tulivyo ahidi kwa Wananchi " Amesema Mhe. Abood.

Mstahiki Meya wa Manispaa ya Morogoro, Mhe. Pascal Kihanga, amehimiza umoja na mshikamano baina ya madiwani wa Halmashauri ya Manispaa ya Morogoro  ili kuweza kuwatumikia vyema wananchi wa Manispaa ya Morogoro.

Mhe. Kihanga, amesema  baada ya uchaguzi huo kumalizika viongozi wanajukumu na wajibu  wa kuwatumikia wananchi wao bila kuchoka ili kuleta maendeleo yao na hatimaye kuweza kuchochea kasi ya ukuaji wa uchumi.