WAFANYABIASHARA MANISPAA YA MOROGORO WATAKIWA KULIPA LESENI KUEPUSHA USUMBUFU WA KUFUNGIWA BIASHARA ZAO.

MKURUGENZI   wa Halmashauri ya Manispaa Morogoro Ally Machela amewataka wafanyabiashara na kulipia Leseni ya biashara,  ili kuepuka usumbufu unaoweza kujitokeza kwa kufungiwa biashara zao.

Ameyasema hayo   Mei 23/2023 wakati akitoa maagizo kwa wataalam wa idara mbalimbalimbali kupita kwa kila mfanyabiashara ili kukagua iwapo mfanyabiashara husika anakibali kinachokubalika kisheria.

Aidha amesema  iwapo itagundulika mfanyabiashara yeyote ambaye amekiuka agizo hilo basi hatua stahiki zitachukuliwa ambazo ni pamoja na kuamuru kufunga biashara kwa hiari yake au kufungiwa na wataalam kwa muda hadi pale atakapokidhi vigezo vya kuendele na biashara hiyo.

Kwa upande wa Afisa Mapato  wa Manispaa  Morogoro  Fatma Lwebangira,  amewataka wafanyabiashara kutoa ushirikiano kwa jopo hilo la wataalamu kwa kutoa maelezo sahihi juu ya uendeshaji wa biashara zao ili kurahisisha zoezi  kutumia muda mfupi na kuendelea na majukumu yao ya kila siku.

Sanjari na kukagua vibali hivyo, jopo  la wataalamu linaendelea kutoa elimu juu ya mfumo mpya wa tausi unaomsaida mfanyabiashara kusajili biashara yake kupitia mfumo huo ambao ni rahisi na wa muda mfupi ukilinganisha na utaratibu wa hapo awali.