DC NSEMWA AWATAKA WADAU WA SANAA KUCHANGAMKIA MKOPO WA ASIMILI 10 WA HALMSHAURI.

 

MKUU wa Wilaya ya Morogoro , Mhe. Rebeca Nsewa, amewataka  waigizaji waliopo katika Tasnia ya Sanaa  kujiimarisha katika kazi zao kupitia mkopo wa asilimia kumi unaotolewa na Halmashauri ya Manispaa.

Hayo ameyasema katika uzinduzi wa mafunzo maalum ya uigizaji katika ukumbi wa soko la kingalu Mjini Morogo yaliyofanyika Machi 03/2023.

“kwakua kuna kiasi cha fedha kinachotengwa  kwaajili ya kusaidia vijana wenye nia ya dhati katika kuleta maendeleo, mnayosababu ya kufuata utaratibu ili kupata fungu litakalosaidia  kuleta ubora katika uzalishaji wa kazi zenu, nami nitawasaidia kwa nafasi yangu ili kufanikisha hilo pale mtakaponihitaji’ Amesema  DC Nsemwa.

Hata hivyo DC Nsemwa, amewataka  wasanii kuzingatia mafunzo ili kuonesha utofauti uliopo kati yao na wale ambao hawajapata mafunzo hayo kwa kutengeneza kazi nzuri kitaalam zenye maudhui ya kuonesha matatizo yanayoikabili Morogoro na njia za kuyatatua kama ukatili na unyanyasaji wa kijinsia pamoja na athari zitokanazo na  uharibifu wa Mazingira.

Aidha, Katibu Mwenezi CCM Wilaya ya Morogoro Mjini, Maulidi Chambilila, amesema kwa kuwa waigizaji hao wapo Jimbo la Morogoro Mjini ,hivyo Mbunge wa Jimbo hilo, Mhe. Dkt. Abdulaziz Abood yupo pamoja na wasanii hao na atendelea kuwaunga mono katika kufikia ndoto zao.

Chambilila, amepongeza Uongozi wa Chama cha waigizaji Morogoro kwa kuandaa Mafunzo hayo yenye lengo la kukuza Tasnia ya Sanaa na kuleta mabadiliko ya ubunifu wa kazi.

Kwa upande wake Mwenyekiti wa waigizaji Mkoa wa Morogoro , Ramadhan Hamis Bugala , ametoa shukrani za dhati kwa Mkurugenzi wa Manispaa ya Morogoro kupitia ofisi ya Utamaduni,Mkuu wa wilaya ya Morogoro na Mbunge wa jimbo la Morogoro mjini kuunga mkono zoezi hili la utoaji mafunzo kwa hali na mali hadi kufanikiwa, ambapo waigizaji 50 wamepata mafunzo hayo na kutunukiwa vyeti maalum.

Mafunzo ya uigizaji filamu yameratibiwa na chama cha waigizaji mkoa wa Morogoro wakishirikiana na Bodi ya filam Tanzania na kutolewa na Muhadhiri wa chuo kikuu Dodoma  Dokta Gervas Kasiga kwa  muda wa siku mbili tarehe 4 na 5 Machi 2023.