‘DAYCARE CENTERS’ ZAPEWA SOMO JUU YA MALEZI SAHIHI YA WATOTO NA VITUO.

 

Afisa Ustawi wa Jamii ambaye pia mratibu kitengo familia na watoto Manispaa ya Morogoro, Hamisa Kagambo, akizungumza na Wamiliki wa Daycare .

VITUO vinavyojihusisha na Malezi ya Watoto maarufu kama ‘Day Care Centers’ Manispaa ya Morogoro  vimetakiwa kufuata sheria na kanuni za uendeshaji wa Vituo hivyo.

Kauli hiyo imetolewa na Afisa Ustawi wa Jamii ambaye pia mratibu kitengo familia na watoto Manispaa ya Morogoro, Hamisa Kagambo, katika Mkutano wa Umoja wa Wamiliki wa vituo vya malezi kutwa  (Day care Centres) Manispaa ya Morogoro wa kujadili katiba yao uliofanyika katika Ukumbi wa Mikutano wa Kingo  Soko Kuu la Chifu Kingalu.

Akizungumza na  wamiliki wa vituo vya malezi kutwa (Day care Centres), Kagambo, amesema lengo la Mkutano huo wa kukutana na wamiliki hao ni kujadili katiba ya Umoja huo pamoja kutatua changamoto  mbalimbali ikiwamo majengo wanayofundishia,  walimu wanaofundisha pamoja na mbinu za kufundishia ili kupata muongozo na uelewa wa pamoja juu ya uendeshaji vituo hivyo.

Kagambo, amesema kuwa , sio vituo vyote vinafanya vibaya lakini vipo baadhi ya vituo ambavyo wamiliki wengi kuwa hawajui namna sahihi  ya kuendesha vituo hivyo na hawajui miongozo kuhusiana na uendeshaji wa vituo vya watoto kutwa. 

“Leo tupo katika Kikao kazi na Umoja wa Wamiliki wa vituo vya Day Care Manispaa ya Morogoro, tumeona tukutane wadau ili tujadili Katiba yetu lakini pia tuweze kuwa na  uelewa wa pamoja kuhusu vituo vya kulea watoto kutwa na maeneo ya makazi kwa watoto wanaoishi mazingira magumu ili sasa pale miongozo mbalimbali na serikali na wadau wanapotaka kutoa elimu tuwe na uelewa wa pamoja  na tuwe tunaelewa nini maana ya vituo hivi” Amesema Kagambo.

“Kuwalea watoto sio jambo rahisi, najua walezi wawatoto wanapitia katika changamoto nyingi, nawaomba waendelee na moyo huo huo wa kuwasimamia watoto wetu , sisi kama Kitengo cha Ustawi wa Jamii Manispaa ya Morogoro tutasimama na nyinyi na pale mtakapo kwama Ofisi zetu zipo wazi njooni tushirikiane lango letu ni kuona Vituo hivi vinafanya kazi nzuri na vinajiendesha kwa misingi ya sheria , kanuni na taratibu lakini suala la usajili liwe kipaumbele  kwenu “ Ameongeza Kagambo.

Aidha, ameutaka Umoja huo mara baada ya kupata usajili, wasiishie hapo kwenye usajili tu bali wafikirie mambo makubwa na fursa zilizopo mbele yao.

Hata hivyo, amesema Manispaa ya Morogoro kuna jumla ya vituo vya Watoto 79 ambapo kati ya vituo hivyo ni vituo 15 tu ambavyo vimepatiwa usajili na vituo 8 bado vipo katika mchakato wa kupata usajili kwani tayari vilishawasilisha vielelezo vyote.

Pia amewaomba Wamiliki wa vituo hivyo wasiwe waoga wanapoogaizwa kuleta Taarifa zao za kibenki ( Benk Statement) , kwani lengo la kuleta hizo taarifa ni kutaka kujua mzunguko wa fedha katika vituo vyao.

Naye, Afisa afya Manispaa ya Morogoro, Martin Mziwanda,amesema mkanganyiko uliokuwepo kwa wamiliki wa vituo kushindwa kutofautisha vituo vya malezi kutwa ‘Day Care Centres’ na shule za watoto ‘Nursery schools’, huku akipongeza muitikio mkubwa wa washiriki na kutoa wito kwa washiriki hao kwenda kuyafanya kwa vitendo yale waliyojifunza.

Mziwanda, amewataka wamiliki wa vituo hivyo kuzingatia suala la usafi na kuandaa maeneo rafiki ya michezo katika vituo vyao.

Kwa upande Mwenyekiti wa Umoja wa Wamiliki wa Vituo hivyo, Clarence Mkwama,  ameshauri  vituo vingine kuanza kujumuisha watoto wenye ulemavu na sio kuchukua watoto wasio na ulemavu pekee kwani bado kuna tatizo kubwa la watoto wenye ulemavu kufungiwa ndani.

Mkwama, amesema  kuwa lengo la vituo hivyo ni kuandaa watoto kimalezi hivyo watoto wenye ulemavu wanahitaji fursa hiyo pia ambapo itawasaidia sana kujitambua na kupata ujuzi wa kimaisha ili waweze kujisaidia wenyewe kwa sasa na hata siku za usoni.