RC SHIGELA AIPONGEZA MANISPAA YA MOROGORO KUPATA HATI SAFI MWAKA WA FEDHA 2019/2020.

Mkuu wa Mkoa wa Morogoro, Mhe. Martine Shigela, (katikati) , akiwa pamoja na Kaimu Mkurugenzi wa Manispaa ya Morogoro Pili Kitwana (kulia) , Mwenyekiti wa CCM Mkoa wa Morogoro, Dorothy Mwamsiku katika mkutano wa wafanyabiashara Soko Kuu Chifu Kingalu. 

Mkuu wa Mkoa wa Morogoro, Mhe. Martine Shigela(wapili kushoto),  Meya wa Manispaa ya Morogoro, Mhe. Pascal Kihanga (kulia), Kaimu Mkurugenzi wa Manispaa ya Morogoro Pili Kitwana (wapili kulia), wakiteta jambo katika mkutano wa wafanyabiashara Soko Kuu Chifu Kingalu. 

Mkuu wa Mkoa wa Morogoro, Mhe. Martine Shigela , akizungumza na Uongozi wa wafanyabiashara Soko Kuu la Chifu Kingalu Morogoro.

MKUU wa Mkoa wa Morogoro , Mhe. Martine Shigela,  ameipongeza Halmashauri ya Manispaa ya Morogoro kwa kupata hati safi kwa kipindi cha miaka mitano  mfululizo kutoka mwaka 2015/2016 mpaka mwaka 2019/2020.

Pongezi hizo zimetolewa leo Juni 16/2021  katika kikao maalum cha Baraza la madiwani cha kujadili hoja za Mdhibiti na Mkaguzi Mkuu wa Hesabu za Serikali (CAG) kuhusu taarifa ya fedha za Manispaa ya Morogoro kwa mwaka 2019/2020,  kilichofanyika katika ukumbi wa mikutano  Soko Kuu la Chifu Kingalu Morogoro.

Sambamba na pongezi hizo, RC Shigela,  amewasifu watendaji wa Manispaa ya Morogoro kwa kushirikiana na Baraza la Madiwani  kwa utendaji wao mzuri wa kazi na kujituma kwa kuwahudumia wananchi wa Manispaa ya Morogoro.

"Ninampongeza Mkurugenzi na watendaji wote wa Halmashauri ya Manispaa ya Morogoro kwa kushirikiana vyema na Baraza la Madiwani  kwa utendaji kazi mzuri ulioleta matokeo mazuri na kuiwezesha Halmashauri kupata hati safi kwa kipindi cha miaka mitano  mfululizo.”

Aidha, RC shigela, ametoa rai kwa watumishi wote wa Halmashauri ya Manispaa ya Morogoro  kutumia utaalamu wao katika utendaji kazi wao na pia kufanya kazi kama timu moja katika kuwahudumia wananchi.

Vilevile amewataka kusimamia vyanzo vya mapato vilivyopo ndani katika kuongeza mapato ya Halmashauri na sio kutegemea vyanzo vya nje.

Aidha ametoa wito kwa wakuu wa Idara kutoa  mafunzo ya kazi kwa vitendo(On job Training) ya mara kwa mara kwa watendaji wao ili kuhakikisha kazi zinafanywa vizuri na kwa ufanisi.

Katika hatua nyengine, RC Shigela, amewataka watendaji wasiopeleka fedha benki wapeleke kwa wakati na wasiofanya hivyo waweze kuchukuliwa hatua kali za kisheria.

Hata hivyo ,ameagiza kufungwa kwa mfumo wa  uhakika wa mapato kwenye Stendi ya mabasi ya Msamvu pamoja na kusimamia vyanzo vikubwa vya mapato ambapo hadi kufikia Agosti mwaka 2021 mfumo huo uwe umeshakamilika.

Pia amezitaka Taasisi za Serikali kuacha tabia ya  kupelekeana kesi Mahakamani jambo ambalo amelipinga vikali huku akizitaka Taasisi hizo ambazo zinakesi wahakikishe  ndani  ya wiki moja wamefuta kesi hizo na kufanya majadiliano yao nje ya mahakama.

Hata hivyo,amesema yupo katika hatua ya kukutana na wakazi wanaoishi katika eneo la Star City kabla ya kukutana na mmiliki wa eneo hilo  ili kuweza kujadiliana nao na kuona jinsi ya kuweza kuondoa changamoto zinazowakabili .

Aidha, amewataka watendaji na watumishi kuhakikisha kwamba wanapatia ushirikiano mzuri Madiwani wapotaka kuongea na wananchi wao katika kutatua kero na changamoto za wananchi.

Mwisho RC Shigela, ameutaka Uongozi wa Manispaa ya Morogoro kuhakikisha kwamba wanayashughulikia magari yote ambayo ni mabovu kwa kuyafanyia matengenezo ili yaweze kufanya kazi pamoja na kupitia mkataba wa Kampuni ya usafi wa Kajenjere ili kuona namna gani ya kuweza kutatua changamoto ambazo wananchi wamkeuwa wakizielekeza kwao.

Kwa upande wa Mstahiki Meya wa Manispaa ya Morogoro na Diwani wa Kata ya Mazimbu , Mhe. Pascal Kihanga, amewataka watendaji kujitahidi kukusanya mapato pamoja na kuweka utaratibu mzuri wa kuweza kushughulikia changamoto za wafanyabiashara wa Soko Kuu la Chifu Kingalu.