DC Msulwa awataka vijana kujiunga na vikundi wapate mikopo.

 

Mkuu wa Wilaya ya Morogoro Mhe. Bakari Msulwa, akizungumza na Wananchi katika Mkutano wa hadhara wa kusikiliza na kutatua kero za wananchi wa Kata ya Mji Mkuu, Sabasaba pamoja na Kata ya Kingo Manispaa ya Morogoro.

Wananchi waliojitokeza kwenye Mkutano wa hadhara wa kusikiliza na kutatua kero za wananchi wa Kata ya Mji Mkuu.

Mkuu wa Wilaya ya Morogoro ,Mhe. Bakari Msulwa, akipitia taarifa za Mwananchi anayedai kulimbikiziwa bili ya Maji , (kulia) Kaimu Mkurugenzi Manispaa ya Morogoro, Michael Waluse.

Mkuu wa Wilaya akisalimia na na Mwananchi mara baada ya kumalizika kwa Mkutano.

MKUU wa Wilaya ya Morogoro, Mhe. Bakari Msulwa,  amewataka Vijana waliopo katika makundi yasiyo rasmi  kujiunga katika vikundi ili waweze kupatiwa mikopo itakayowasaidia kujikwamua kiuchumi.

Hayo ameyasema leo Septemba 07, 2020 kwenye Mkutano wa hadhara wa kusikiliza na kutatua kero za wananchi wa Kata ya Mji Mkuu, Sabasaba pamoja na Kata ya Kingo Manispaa ya Morogoro.

Akizungumza na Waandishi wa habari kwa nyakati tofauti tofauti wakati wa ziara hiyo,  amesema Vikundi vingi vya Vijana visivyo katika mfumo rasmi vimekuwa havikopesheki kwa sababu hawajajiunga katika vikundi vinavyotambulika na Manispaa zao na kutokuwa na Katiba.

“Ili kuendana na sera ya Serikali ya viwanda, vikundi hivi ambavyo havipo rasmi huu ni wakati sasa wa wao kukaa pamoja kutengeneza katiba na kupata usajili, hivyo baada ya usajili sasa vitakuwa rasmi vinatambulika na watakuwa   hawana budi kujiunga katika vikundi vidogo ili kupata mikopo itakayowasaidia kuanzisha viwanda vidogo jambo ambalo litawasaidia kuongeza kipato na ajira kwa watu wengine ,” Amesema DC Msulwa .

DC Msulwa, amesema ili mjasiriliamali aweze kufanikiwa lazima awe na nidhamu na fedha anayopata na si kuitumia hovyo kwani itasababisha kuyumba kwa biashara na hatimaye kufilisika.

Kwa upande wake, Kaimu Mkurugenzi wa Manispaa ya Morogoro, Michael Waluse , amesema ili Vijana wafanikiwe lazima waondokane na tabia ya kuwa na vikundi ambavyo sio rasmi na kuwa katika vikundi rasmi vinavyotambulika ili viweze  kujikwamua kiuchumi na kujijengea ajira kuliko kusubiri kuajiriwa.