RC SANARE AWATAKA WAZAZI NA WAALIMU KUSHIRIKIANA ILI KUONGEZA VIWANGO VYA UFAULU.

Mkuu wa Mkoa wa Morogoro, Mhe. Loata Sanare akiwa pamoja na  Wanafunzi wa Chekechea mara baada ya kuwasili katika Ukumbi wa Mkutano Shule ya Msingi Chief Albert. 

Mwalimu Mkuu Shule ya Msingi Chief Albert , Bi Theresia Swai, akisoma taarifa ya Shule .

Mkuu wa Wilaya ya Morogoro, Mhe. Bakari Msulwa, akizungumza na Waalimu pamoja na Kamati ya Shule katika Ukumbi wa Shule ya Msingi Chief Albert. 

Katibu Tawala Wilaya ya Morogoro, Ruth John, akizungumza kwa ajili ya kumkaribisha Mkuu wa Wilaya. (kushoto) Afisa Elimu Msingi Manispaa ya Morogoro, Chausiku Masegenya.

WAZAZI  na Walimu wametakiwa kushiriana kwa karibu ili kwa kuweza kuinua taaluma ya watoto wawapo mashuleni na hivyo kuwajengea msingi ulio bora katika maisha yao ya kila siku.

Hayo ameyasema leo Septemba 08,2020 wakati wa ziara ya kukagua maendeleo ya Shule ya Msingi Chief Albert , iliyopo Kata ya Mindu Manispaa ya Morogoro.

 

Akizungumza na Waandishi wa habari, RC Sanare, amesema wazazi ni nguzo ya kwanza kwa watoto na ili wafanikiwa ni lazima wanapowapeleka shuleni wahakikishe wanashirikiana na walimu wa watoto hao kikamilifu.

Aidha RC Sanare, ameipongeza shule hiyo kwa kuwa mfano bora kwa upande wa TEHAMA kwa Shule za Msingi Mkoani Morogoro huku akiwaagiza Maafisa Elimu Msingi wote kuhakikisha wanakuwa na mipango endelevu ya kuona kila Shule inakuwa na Chumba cha Kompyuta na kuwa na vifaa vya kutosha ili waanze kuwakuza Watoto katika msingi mzuri juu ya somo la TEHAMA.

 

RC Sanare, amebainisha kuwa shule hiyo imekuwa ikifanya vema kila wakati kwa kuwa walimu wamekuwa mstari wa mbele katika ufundishaji ulio bora unaofanya mtoto anapokuja shule hiyo anaonesha mabadiliko muda mfupi na hiyo ni sababu ya uangalizi bora wa walimu hao kwa watoto.

Lakini kwa mujibu wa taarifa iliyosomwa na Mwalimu Mkuu wa Shule hiyo ya Chief Albert, Mwl. Theresia Swai, amesema kuwa ufaulu wa Shule hiyo umekuwa ukiridhisha na kusema kuwa hii inamaanisha watoto hao ni zao jema katika maisha ya baadaye endapo wazazi wataendelea kuzingatia kuwafuatilia kwa ukaribu.

“ Viwango vya ufaulu vinakuja kutokana na Ushirikiano mzuri wa Wazazi na Waalimu, kwahiyo lazima mtambue kuwa wazazi wanafanya kazi nzuri kwa kuwaandaa watoto wao katika ujenzi wa Taifa kwani mchango wao ni Asilimia 25 hivyo wasijisahau kuona umuhimu kuwalipia chakula cha mchana kwani inamsaidia kumfanya mtoto awe makini darasani pasipo kushinda na njaa” Amesema RC Sanare.

Naye Mkuu wa Wilaya ya Morogoro, Mhe. Bakari Msulwa, amesisitiza ushirikiano huku akiwataka Waalimu na Wazazi washirikiane vizuri na wasiwe sehemu ya matatizo kwani kufanya hivyo kunafifiza ufaulu kwa wanafunzi wao.

“Nimepokea maagizo kwa Kiongozi wangu wa Mkoa, nitayafanyia kazi haraka iwezekanavyo , lakini Wazazi na Waalimu tusiwe sehemu ya matatizo, tushikamane kwa kila jambo, haya yote niliyoyasikia na kuagizwa Jumamosi asubuhi nitafika hapa tuzungumze na Wananchi kwanza baada ya hapo tutakaa na kamati ya shule (Wazazi) na Waalimu ili tuone tunatatua vipi hizi changamoto, tukitoka hapo tusitafute mchawi tuwe wamoja kwa ajili ya kusukuma gurudumu mbele la taaluma katika Manispaa yetu na Wilaya yetu kwa ujumla”Amesema DC Msulwa.

Upande wa Mwalimu Mkuu wa Shule ya Msingi Chief Albert, amesema kuwa  mategemeo ya shule ni kuwasaidia watoto hasa wa darasa la saba mwakani kuweza kufika nafasi za juu kitaaluma.

Aidha, Bi Theresia ametoa shukrani zake kwa Mkuu wa Mkoa, Mkuu wa Wilaya , Katibu Tawala , Kaimu Mkurugenzi na wengine wote waliofika na kuungana na uongozi wa shule na kusema hali hiyo inaonesha wote ni wamoja.