MANISPAA YA MOROGORO YATOA MAFUNZO YA UJASIRIAMALI KWA VIKUNDI VYA WAAWAKE , VIJANA NA WATU WENYE LEMAVU.

HALMASHAURI ya Manispaa ya Morogoro leo Septemba 16,2020  imetoa mafunzo kwa ajili ya vikundi  vya wajasiriamali wanawake, vijana na watu wenye ulemavu katika ukumbi wa Mikutano wa Manispaa.

Akizungumza na Waandishi wa Habari, Afisa Maendeleo ya Jamii, Manispaa ya Morogoro, Enedy Mwanakatwe, amesema  lengo la Mafunzo hayo ni kuwajengea uwezo wa kutumia vema na kurejesha mikopo ambayo Halmashauri inatoa asilimia 10 ya mapato yake kwa ajili ya kuviwezesha Vikundi hivyo kiuchumi.

Aidha, Mwanakatwe, amesema Manispaa inatarajia kutoa Shilingi Milioni 214 laki 9 ya fedha zilizosalia za mwaka wa fedha wa 2019/2020 ili kuviwezesha vikundi hivyo kujikwamua kiuchumi, kujiongeza kipato na kupunguza tatizo la ajira kwa kujihusisha na shughuli mbalimbali za kiuchumi kwa ajili ya maendeleo ya Maisha yao na Manispaa kwa ujumla.

Mwanakatwe, amesema kuwa mikopo inayotolewa ina lengo la kuhakikisha wananchi wanajikwamua kiuchumi hivyo ni vyema wakatumia fursa ya kuchukua mikopo na kuitumia kikamilifu ili waweze kurejesha marejesho kwa wakati.

Miongoni  mwa mafunzo yaliyotolewa ni pamoja na kuwafundisha na kuwaelekeza jinsi ya kutumia mikopo hiyo kama ilivyokusudiwa na kujua namna ya kutafuta masoko katika biashara zao, uandaaji wa mipango ya biashara, uwekaji wa kumbukumbu, usimamizi na uendeshaji wa vikundi, sheria na kanuni za mikopo,  pamoja na kufahamu namna ya uwekaji wa akiba.

Mwisho,  amevitaka vikundi vyote kuwa mabalozi wazuri kwa wananchi wengine ambao bado hawana muamko wa mikopo ya wanawake, vijana na watu wenye ulemavu ambayo haina riba na kuendelea kuwasisitiza wanavikundi wote waliohudhuria mafunzo hayo kuhakikisha wanarejesha mikopo hiyo kwa wakati ili kupata nafasi ya kukopesheka zaidi na kutoa fursa kwa vikundi vingine kuweza kupata mikopo.