Milioni 214 kutolewa kwa Vikundi vya Wanawake, Vijana na Watu wenye Ulemavu Manispaa ya Morogoro.

 

 

HALMASHAURI ya Manispaa ya Morogoro  inatarajia kutoa zaidi ya Shilingi milioni 214 kwa ajili ya mikopo ya Wanawake, Vijana na Watu wenye Ulemavu.

Kauli hiyo imetolewa leo Septemba 17,2020 na Afisa  Afisa Maendeleo ya Jamii, Enedy Mwanakatwe, kwenye Ukumbi wa Mikutano wa Manispaa ya Morogoro wakati wa zoezi la Utiaji wa saini kwa Wawakilishi wa vikundi hivyo.

Akizungumza na Waandishi wa habari, Mwanakatwe, amesema jumla ya Vikundi 13 vinatarajiwa kunufaika  na fedha hizo zinazotolewa na Halmashauri ya Manispaa ya Morogoro ambapo fedha hizo ni sehemu ya asilimia 10 ya Mapato ya ndani ya Halmashauri.

Aidha, katika hatua nyengine, vikundi hivyo leo vilikuwa katika zoezi la utiaji wa saini pamoja na semina ya kanuni za Utoaji na usimamizi wa mikopo kwa Vikundi vya Wanawake, Vijana na Watu Wenye Ulemavu ambapo semina hiyo iliendeshwa na Mwanasheria wa Manispaa ya Morogoro, Elikarimu Tyeah.

“Leo ni siku ya pili ya mafunzo yetu  ya ujasiriamali kwa walengwa wa mikopo  , tunatarajia kutoa mikopo kwa fedha shilingi milioni 241,490,000/=  zilizobakia katika bajeti yetu ya mwaka wa jana 2019/2020 kabla  ya mwaka huu wa fedha lakini tumeona tuanze na mafunzo kama sheria inavyosema ili walengwa wetu wawe na ufahamu mkuwa tukiwa lengo kuwawezesha wanawake, watu wenye ulemavu na vijana na jamii kwa ujumla kuweza kujiajiri. kuwafanya wanawake na vijana watambue wajibu wao katika kujiletea maendeleo na kuifanya jamii kutambua fursa mbalimbali zilizo za halali katika maeneo yanayowazunguka,” Amesema Mwanakatwe.

“Bajeti iliyopita katika mapato yetu ya ndani ya asilimia 10 tulishatoa mikopo kwa vikundi vingi sana na mpaka sasa vikundi vimeweza kujipatia maendelo ya wao wenyewe  kwa kufanya biashara ndogondogo na hivyo wameweza kujikimu katika malazi, chakula na mavazi. wanawake, walemavu na vijana wa Manispaa ya Morogoro  wanaheshimika kwa kuwa sasa wanao uwezo wa kufanya biashara na kupata fedha za kujikimu” Ameongeza Mwanakatwe.

 

Mwisho, Mwanakatwe, ametoa rai kwa Walengwa hao wa mikopo kuwa fedha wanazopatiwa sio msaada bali zinatakiwa kurejeshwa kwa wakati na kuzifanyia shughuli zilizokusudiwa kwa ajili ya kujiletea maendeleo binanfsi na Taifa kwa ujumla.

 

Naye Mwanasheria wa Manispaa ya Morogoro, Elikarimu Tyeah, amesema kuwa fedha watakazokopeshwa  wanapaswa kuzitumia katika malengo waliyoombea na siyo kupeleka katika matumizi mengine kama vile starehe na anasa ambazo zitawafanya washindwe kurejesha.

“”Leo tumesaini mikataba, mtambue hizi ni fedha ambazo zinahitaji mzunguko, sio unapata unazitumia kwa ajili ya starehe kwakweli tutafikishana Mahakamani na tutawafunga, kikubwa baada ya kupata fedha hizi zitumike katika malengo yaliyokusudiwa ilia zirejeshwe kwa wakati na wengine waweze kuapatiwa, tuzingatie sheria na kanuni , tukifanya hivyo tutakuwa watu wema na tutaendelea kuaminika zaidi na kupata mikopo zaidi ya hapa na kubadilisha maisha yetu na kuchangia pato la Taifa hususani katika kuelekea Tanzania ya Viwanda na Uchumi wa wakati ambapo kwa sasa tumefikia””Amesema Elikarimu.

Katika Mwaka wa fedha wa 2019/2020 Manispaa ya Morogoro ilitoa jumala ya  shilingi milioni 517,800,000/= kwa ajili ya mikopo ya uwezeshaji kwa vikundi 72, ikihusisha vikundi 44 vya wanawake na vikundi 22 vya vijana pamoja na Vikundi 6 vya Watu wenye Ulemavu.

Ikumbukwe kwamba Halmashauri ya Manispaa ya Morogoro,  katika utekelezaji wa bajeti yake kila mwaka imekuwa ikitenga asilimia 10  ya Mapato ya ndani kwa ajili ya Mikopo ya Wanawake asilimia 4,Vijana asilimia 4 na asilimia 2 kwa Watu wenye Ulemavu.