DC Chonjo atoa wiki 2 kuvunjwa kwa vibanda vya Mabanzi nje ya Stendi Msamvu.

Mkuu wa Wilaya ya Morogoro, Mhe. Regina Chonjo, akikagua Vibanda vilivyoungua na Moto kufuatia hitilafu ya umeme nje kidogo ya Kituo cha Mabasi Msavu.

Mkuu wa Wilaya ya Morogoro, Mhe. Regina Chonjo,(kushoto), Mkurugenzi Manispaa ya Morogoro, Sheilla Lukuba (kulia), Mstahiki Meya wa Manispaa ya Morogoro , Mhe. Pascal Kihanga (kushoto mwa DC Chonjo) na viongozi wengine wakifuatilia kwa makini eneo la vibanda vilivyoungua moto.

Vibanda vilivyoungua kufuatia hitilafu ya umeme Kituo cha Mabasi Msavu. 

Guzo la Umeme ambapo imetokea hitilafu ya umeme lilopo nje ya Kituo cha Mabasi Msavu eneo la geti la kuingilia Mabasi.  

Baadhi ya Bidhaa zilizoungua moto .
Muonekano wa vibanda vilivyoungua.

MKUU wa Wilaya ya Morogoro, Mhe. Regina Chonjo, ametoa muda wa siku 14 kwa wafanyabiashara waliojenga Vibanda vya mabanzi nje kidogo ya Stendi ya Mabasi Msavu wayavunje ili waingie ndani ambapo ndipo maeneno yametengwa kwa ajili yao .

Kauli hiyo ameitoa mei 31, 2020 wakati wa ziara ya kukagua vibanda ambavyo viliungua na moto kufuatia  kutokea wa hitilafu ya Umeme.

Akizungumza na Waandishi wa habari, amesema Serikali imetengeneza miundombinu inayokubaliaka inayoendana  na Stendi hiyo ya kisasa  kwa kuweka fremu nzuri ambazo zinapangishwa kwa wafanyabishara.

Chonjo ,amesema vibanda hivyo vilivyojengwa kiholela vinaweza kusababisha hasara kubwa ya uwekezaji wa kitega uchumi chenye thamanai ya shilingi Bilioni 24 jambo ambalo amelikemea vikali na kuwataka wafanyabiashara hao kuhamia ndani kwa kufuata utaratibu uliopangwa na Uongozi wa Stendi ya Mabasi Msamvu.

Amesema kuwa licha ya kutambua kuwa wafanyabiashara hao wanatafuta ridhiki lakini amewaambia ridhiki nzuri ni ile inayotafutwa mahali kwenye usalama na sio eneo ambalo wao wametengeneza vibanda vyao ambavyo vinahatarisha maisha ya Stendi nzima inapotokea janga la moto.

 “Nawapa wiki mbili yani siku 14, Mabanda haya ya Mabanzi yaliyopo eneo hili  tusiyakute , yaondosheni nendeni kwenye maeneno ambayo yametengwa na hii Stendi,  haikujengwa kwa miundombinu ya namna hii,Meneja wa Msamvu wachukue hawa wapangisheni, hata wakikaa watatu fremu moja sio mbaya  mbona hapa nasikia wanakaa hadi watatu na wanalipa kodi, hizi sehemu mlizoweka mabanda zinasomeka kama sehemu za miti na maua kwa ajili ya kupumzika wananchi wa  Manispaa ya Morogoro,lakini hata huu umeme ni wa uwizi haiwezekani Meneja wa TANESCO awapitishie umeme  kienyeji namna hii kwa kupitisha chini kwenda kwenye Mabanda  “ Amesema DC Chonjo.

Chonjo, amesema watakapoingia ndani itawarahisishia kujua biashara zao zinakwendaje, na kujua ni kwa muda gani mabasi yana simama kwa ajili ya kupata huduma.

“”Nakumbuka ajali ya moto iliyotokea mwaka jana,bahati mbaya hakuna aliyejua kama itatokea ajali  wengi mlikimbilia huko mkasema mnafuata utajiri , lakini kilichotokea ni vilio, sasa kama hapa nako kukitokea hivyo ni hatari hatuwezi kuhatarisha maisha ya wananchi wetu kwa jambo ambalo  halikubaliki , hivyohivyo nyinyi mkiuungua na eneo hili likiteketea atakayewajibishwa ni mimi  inapotokea  janga hili ,  nimetoa siku 14 kama bado mimi nikija na vibomoa vyote, tukubali kufuata utaratibu uliowekwa” Ameongeza DC Chonjo.                                                                                                                                                                                                                                                                                                                

Aidha, amesema kama Moto huo ungeunguza vibanda vyote na stendi hiyo imezungukwa na vituo vya mafuta na kuna mabasi ya abiria ambayo yanapita na vyombo hivyo vina mafuta , basi wangekuwa wanazungumzia janga jengine la moto la Msamvu.

Hata hivyo, amemuagiza Meneja wa TANESCO kukatisha mawasilinao ya umeme  katika Vibanda vyote vya wafanyabiashara Stendi ya Msamvu kwani njia walizotumia katika kuunganisha umeme sio salama.

Aidha, amemuagiza Mkurugenzi wa Manispaa ya Morogoro, ndani ya wiki mbili kazi ya kuweka miundombinu ya kurejesha ramani ya Stendi ya Msamvu kama ilivyokuwa iwe imeanza kwa ajili ya usalama wa Stendi, wananchi pamoja na Jengo lenyewe.

Naye Kamanda wa Zimamoto na  Uokoaji Wilaya ya Morogoro, ACP Goodluck Zelote, amesema kuwa mabanda yaliyoungua sana ni mawili ambayo yalikuwa yamehifadhia vitu vya wafanyabiashara wengine , lakini kikubwa walichokifanya  ni kuzima moto na hatua iliyopo kwa sasa ni kuweza   kujua gharama ya vitu ambavyo vimeteketea  kwa Moto ili tuone kuna hatua gani itachukuliwa” Amesema ACP. Zelote.