DC Chonjo atatua mgomo wa Wafanyabiashara Soko la Mawenzi Manispaa ya Morogoro.

Mkuu wa Wilaya ya Morogoro, Mhe. Regina Chonjo, akijibu hoja za Wafanyabiashara wa Soko la Mawenzi Manispaa ya Morogoro kufuatia mgomo walioufanya leo Juni 4, 2020. (kulia) Kaimu Mkurugenzi Manispaa ya Morogoro, Waziri Kombo.

Kamanda wa Polisi Wilaya ya Morogoro, (OCD) Jackson Kahamba,akizungumza  na Wafanyabiashara kufuatia wito wa barua alioutoa kwa wafanyabiashara 12 wa kufika Kituo cha Polisi kwa ajili ya majadiliano ya mgomo huo.

MKUU wa Wilaya ya Morogoro, Mhe. Regina Chonjo, ameutatua mgomo  wa Wafanyabiashara wa Soko la Mawenzi Manispaa ya Morogoro baada ya kuingilia kati na kuwaomba Viongozi kukaa meza moja kwa ajili ya kutatua mgogoro huo.

Tukio hilo la mgomo la Wafanyabiashara hao limefanyika leo Juni 04, 2020 kwewnye Soko hilo huku baadhi ya Wafanyabiashara  wakijawa na taharuki na sintofahamu kufuatia wenzao kuitwa Kituo cha Polisi baada ya kupokea  barua ya wito kutoka kwa   Kamanda wa Polisi Wilaya ya Morogoro juu ya Mgogoro huo.

Akizungumza na Waandishi wa habari, Chonjo, amesema kuna taarifa za upotoshaji zilifanyika juu ya wito wa wafanyabiashara 12 walionadikiwa barua ya kuhitajika Kituo cha Polisi Wilayani .

Chonjo ,amesema wito huo ulikuwa na nia njema sana kwa wafanyabiashara hao lengo ni kujua ni changamoto gani wanakabiliana nazo katika Soko lao na kujua ni kwa namna gani wanaweza kufanya suluhu ya Mgogoro huo.

"Hivi kweli ukamataji wa Polisi ni kutumiana barua? Lengo la Polisi ni kuwaita ili kujua kuna kitua gani kinaendelea na kujadili kwa pamoja, hivyo niwatoe hofu kuitwa kwao Polisi ilikuwa njia njema na pengine wangekwenda ilikuwa ni kueleza kero na changamoto zinazolikabiri Soko la Mawenzi “ Amesema DC Chonjo.

Mbali na barua za wito kwa Wafanyabiashara hao, zilizuka hoja mbali mbali zinazohusiana na Wafanyabiashara hao ambazo zote zilihitaji ufafanuzi wa kina kutoka kwa Mkuu wa Wilaya.

Akijibu hoja ya mafanyabiashara  aliyetaka kujua juu ya hatima  ya eneo la   la TTCL ambalo waliliomba kipindi cha Utawala wa aliyekuwa Mkuu wa Mkoa wa Morogoro , Mhe. Stephen Kebwe, DC Chonjo, amesema ni kweli kuwa TTCL waliandika barua la kulitaka eneo lao.

“Ni kweli TTCL wameandika barua ya kulitaka eneo lao, na sisi Uongozi tumewaomba kwa kutambua waliopo hapo ni watu na wanatafuta ridhiki , na ombi letu walituambia tujenge vibanda ambavyo sio vya kudumu, sasa sisi tumewaomba watupe muda na kuona jinsi ya kuwapanga wafanyabiashara wetu namna ya kupata ridhiki na hili ombi la muda na bahati mbaya hawakutujibu tunaendelea kuwaomba lakini tunaimani  baada ya wiki mbili zijazo Soko letu Kuu la Kimkakati litakuwa tayari , na wale wa Manzese tutawarudisha Sokoni na watakao taka kuomba Manispaa itatoa tangazo kwa ajili ya maombi hayo” Amesema DC Chonjo.

Kuhusu hoja ya Malori  makubwa kutofika Mjini kushusha mizigo, amesema kwa sheria za TARURA na TANROADS, na kanuni walizoziweka Manispaa ya Morogoro Malori makubwa hayatakiwi kuingia kwenye barabara ndogo.

“Agizo linasema magari yenye uwezo wa tani 3 kushuka chini ndiyo yatakayoruhusiwa kuingia ndani ya miji na kwenye Masoko yote ya Manispaa , lakini nasikitika sana Wataalamu wetu hawajatutendea haki , kama agizo ni tani 3 kuja Mawenzi, kibali cha tani 3 kutoka nanenane cha nini? Kuchukua kibali cha tani 3 ni ukiritimba na unachelewesha watu kutofikisha bidhaa zao kwa wakati na kusababisha hasara ” Ameongeza DC Chonjo.

Mwisho, amepiga marufuku ushushwaji wa mizigo usiku , huku akisema jambo hilo sio sahihi , lakini akalumu kutokuwepo kwa wawakilishi katika vikao vya kimaamuzi ambapo jambo hilo linasababisha kutotolewa kwa taarifa sahihi kwa wafanyabiashara ambao wanategemea mapokeo kutoka kwa Uongozi wao.

Kwa upande wa Kamanda wa Polisi Wilaya ya Morogoro, (OCD) Jackson Kahamba, amesema wajibu wake ni kulinda watu pamoja na mali zao hivyo anavyopata taarifa juu ya sintofahamu anawajibu wa kufuatilia na kujua yaliyopo ili kuweza kuchukua maamuzi kwa mujibu wa sheria na kanuni za Jeshi la Polisi.

“ Nilipata taarifa ya sintofahamu juu ya makundi mawili ambayo baadae yataleta tafrani, kwa dhamana niliyokuwa nayo nikaona niwaandikie barua hawa wawakilishi wan wanaoshusha mizigo  ili tuweze kujua nini chanzo na tupate suluhisho ili maisha yaendelee kama kawaida,ila siku na lengo la kuwakamata , ningekuwa na lengo hilo pasingekuwa na haja ya kuwaandikia barua ningetuma askari  kawakamateni  kama majina yalivyokuwa yameainishwa, niwaondoe hofu na sijawahi kuweka mtu nandi kwa sababu haya  ni mambo yanayotakiwa kuyajadili na kuyapatia ufumbuzi” Amesema OCD Kahamba.

Kwahiyo kwa Sasa Hali shwari  na Wafanyabiashara wanaendelea Kama kawaida kutoa huduma.