DIWANI CHUNGA ATAKA USHIRIKIANO WA WATENDAJI KULETA MABADILIKO

DIWANI wa Kata ya Mzinga,Mhe. Salum Chunga, amewataka Watendaji wa Kata ya Mzinga pamoja na wananchi wa Kata hiyo kushirikiana katika kuleta mabadiliko ya kimaendeleo na kutatua changamoto mbalimbali zinazowakabili wananchi wa Kata hiyo.

Kauli hiyo ameitoa hivi karibuni katika Mkutano wa Baraza la Maendeleo  la Kata (BMK) Septemba 14/2022 wakati akipokea taarifa mbalimbali za utekelezaji .

Mhe. Chunga , amesema kuwa Watendaji wakishirikiana vyema na kuwa kitu kimoja kwa  wakishirikiana vizuri wananchi watapata maendeleo kwa haraka zaidi.  

“Mimi nitajitahidi kuwa mvumilivu maana ndio Kiongozi Mkuu wa Kata, lakini  sitakuwa mvumilivu na mtu yoyote anayekwamisha au atakayekwenda kinyume na haya tunayoyapanga, kwani kwenda kinyume ni kuchelewesha maendeleo  ya wananchi  wetu " Amesema Mhe. Chunga.

Aidha, amewaomba Wenyeviti wa Mitaa kutoa ushirikiano  katika kutatua changamoto mbalimbali zinazowakabili wananchi.  

Katika hatua nyengine, Mhe. Chunga, amewataka Watendaji pamoja na Wenyeviti wa Mitaa   kushiriki kikamilifu katika kuhamasisha wananchi kujiunga na mfuko wa  Bima ya afya iliyoboreshwa ya CHF ili wananchi wapate unafuu wa matibabu wanapofika katika vituo vya afya kufuata huduma.

Amesema kwa sasa changamoto iliyopo ni upande wa madarasa 3 ambayo yanahitaji kumaliziwa kwani upauaji na uwezekaji umefanyika.

Mbali na Shule lakini ameomba Serikali kuwaangalia kwa huruma hususani katika kumalizia ujenzi wa Majengo ya Zahanati yao ambayo kwa sasa yamefikia hatua nzuri bado upauaji na umaliziaji ili yaweze kutumika.

Amesema changamoto nyengine ni barabara , ambapo ameiomba Serikali kuweka nguvu katika kuboresha barabara kwani imekuwa ni changamoto hususani katika kipindi cha mvua.