MANISPAA YA MOROGORO YAJIPANGA KUKABILIANA NA MAGONJWA YA MLIPUKO.

MANISPAA ya Morogoro  imejipanga kuhakikisha inachukuwa tahadhari ya kukabiliana na magonjwa ya mlipuko katika kipindi hiki ambacho mvua zinaendelea kunyesha.

Hayo yamezungumzwa na Afisa Afya Manispaa ya Morogoro , Ndimile Kilatu kwa niaba ya Mkurugenzi wa Manispaa katika kikao kazi  cha Maafisa afya wa Kata kilichofanyika Ukumbi wa Mikutano wa Manispaa  Desemba 8/2023.

Kilatu, amesema  mvua zinazoendelea kunyesha  ni chanzo kikubwa katika kusababisha magonjwa ya mlipuko kama kipindupindu na mengineyo. 

"Tumekutana na Maafisa afya wa ngazi za Kata na timu yetu ya Manispaa , lengo la kikao chetu ni  kujadili namna gani tutaweza kukabiliana na magonjwa haya ya mlipuko hivyo ni lazima tujiweke katika tahadhari linapotokea jambo tuwe katika namna nzuri ya kukabiliana nalo." Amesema Kilatu.

Kilatu, amewataka wananchi katika maeneo yao ya nyumbani kuendelea na desturi ya kuweka  vitakasa mikono huku akiwataka Maafisa afya wa Kata kuendelea  kutoa elimu ya usafi wa mazingira kwa jamii.