Mkurugenzi Manispaa Morogoro afufua matumani ya Mradi wa Stendi ya Daladala Kaloleni.

Mkurugenzi wa Manispaa ya Morogoro, Sheilla Lukuba, akizungumza na Waandishi wa habari mara baada ya kumalizika kwa Kikao cha Baraza la Madiwani leo kwenye Ukumbi wa Mikutano wa Manispaa Februali 30,2020.

Mkuu wa Wilaya ya Morogoro, Mhe. Regina Chonjo akiandika taarifa wakati wa Baraza la Madiwani likiendelea.




Mstahiki Meya Manispaa ya Morogoro, Mhe. Pascal Kihanga akiongoza Kikao cha Baraza la Madiwani.

 Waheshimiwa Madiwani wakipimwa Joto na mtaalamu wa afya wakati wa Kikao cha Baraza.

 Waheshimiwa Madiwani wakifuatilia kwa umakini vifungu vya kikao.

MKURUGENZI wa Manispaa ya Morogoro, Sheilla Lukuba, amewataka Wananchi  wa Manispaa ya Morogoro kuondoa hofu juu ya Mradi wa Stendi ya Daladala Kaloleni baada ya kusimama kwa muda mrefu kufuatia Mkandarasi kuukacha mradi huo .

Hayo ameyazungumza leo Februali 30, katika kikao cha Baraza la Madiwani kilichofanyika kwenye Ukumbi wa Mikutano wa Manispaa ya Morogoro.

Akizungumza na Waandishi wa Habari, Lukuba, amesema matumaini ya Ujenzi wa Stendi ya Daladala Kaloleni yamefufuka kufuatia kupata Mkandarasi Mpya kutoka Kampuni ya Ujenzi ya  Nandhra ambayo ndiyo inayoendelea na Ujenzi wa Soko Kuu la Kisasa na Stendi mpya ya Daladla Mafiga.

Aidha, amesema kwa sasa Mkandarasi yupo eneo la tukioa na tayari ameshaanza kazi ambapo katika kandarasi yake amepewa muda wa miezi 2 sawa na siku 60 ili kukamilisha Ujenzi wa Stendi hiyo.

Lukuba amesema Ujenzi huo utagharimu kiasi cha Shilingi Milioni 640 ambazo ni fedha za mkopo wa Benki ya Dunia chini ya fedha za  uboreshaji Miji ( Urban Local Government Strengthening Program (ULGSP) .

“Tunaishukuru sana Serikali ya awamu ya Tano chini ya Rais wa Jamhuri ya Muungano wa Tanzania, Mhe. Dkt. John Pombe Magufuli kwa kutupatia fedha za miradi mingine, ametupatia fedha za Mradi wa Soko Kuu la Kisasa Bilioni 17 , Stendi ya Daladala Mafiga Bilioni 5.2 ,  Mto Kikundi ukarabati jumla ya Milioni 774, Shule ya Sekondari Mji Mpya Bilioni 1.4, ukarabati wa Shule Kongwe ya Sekondari Morogoro  na miradi kibao , tunakila sababu ya Kumpongeza kwani atatufanya Manispaa kuweza kukusanya na kuongeza  mapato yetu ya ndani bila kutegemea Serikali kuu “ Amesema Lukuba.

Amesema kufuatia kuvunja mkataba na Kampuni ya Fast iliyopewa kandarasi ya ujenzi wa Stendi ya Kaloleni, tayari ameshaunda Tume itakayochunguza gharama zilizotumika na kampuni ndipo waweze kuwafungulia mashataka ya madeni yaliyobakia.

Amesema Kampuni ya Fast ilichukua mkataba wa muda wa miezi 3 sawa na siku 90  ambapo walipewa kiasi cha Shilingi Milioni 108 lakini walishindwa kutekeleza mradi huo kwa wakati licha ya Kuongezewa muda wa siku 45 na Katibu Tawala wa Mkoa wa Morogoro, Eng. Emmanuel Kalobelo kufuatia kuukacha mradi huo na kutokomea.

Katika hatua nyeninge, Baraza la Madiwani la Manispaa ya Morogoro, limeomba kujua pesa halisi zilizotumika katika Ujenzi wa Stendi ya Mafiga na taarifa zake zifikishwe katika Kikao cha Kamati ya fedha kijacho ili kama kuna fedha zimebakia ziweze kutumika katika ujenzi wa Vioski vya Biashara pamoja na Mabanda ya Mama na Baba lishe ikiwemo na maeneo ya Wamachinga.