MANISPAA YA MOROGORO YAENDESHA ZOEZI LA UKUSANYAJI TAARIFA ZA ANWANI ZA MAKAZI KWA KATA 8.

Mratibu wa zoezi la ukusanyaji wa Anwani za Makazi Manispaa ya Morogoro, jackline Mushi akiwasilisha taarifa ya zoezi hilo.

HALMASHAURI ya Manispaa ya Morogoro, imeendesha zoezi la ukusanyaji wa Taarifa za anwani za makazi katika Kata 8 kati ya Kata 29 zilizopo katika Manispaa hiyo.

Akizungumza katika mafunzo ya kujenga uelewa kwa viongozi, watendaji na wataalam wa Mkoa wa Morogoro kuhusu mfumo wa anwani za makazi na postikodi, Mratibu wa zoezi hilo Manispaa ya Morogoro , Jackline Mushi, amesema zoezi hilo lilianza tarehe Desemba 19/2021 hadi Desemba 23/2021.

Mushi, amesema kuwa zoezi hilo lilifanikiwa kwa ushirikiano mzuri walioupata kutoka Ofisi za Kata , Mitaa na Wenyeviti wa Mitaa husika.

Aidha, amesema katika zoezi hilo jumla ya Anwani 4437 zilikusanywa katika Kata 8 ambazo zoezi hilo lilifanyika.

“Tumefanya zoezi hili kwa ushirikiano mkubwa wa Ofisi za Kata husika, kwakweli tumefanikiwa kwa asilimia kubwa , huduma zote zinazopatikana katika kata hizi 8, zipo katika Mfumo wa Anwani za makazi (NAPA), lakini tutahakikisha tunafikia kata zote 21 zilizobakia ” Amesema Mushi.

Kata ambazo zimefanya zoezi hilo ni pamoja na Kata ya Boma, Mji Mkuu, Mlimani, Mbuyuni, Sultan Area, Kingo, Mji Mpya , na Kata ya Sabasaba.

Amesema kuwa matarajio yao ni kubandika namba katika nyumba zilizowekwa Anwani za makazi katika Kata 8 ambapo namba zipo na mchakato wa kuzibandika unaendelea, kuhamasisha wadau mbalimbali katika kuchangia zoezi la uwekaji Anwani za makazi, kuendelea na zoezi uwekaji wa Anwani za makazi katika Kata 21 zilizobakia pamoja na Halmsahauri kuipa kipaumbele katika kutemnga vifungu katika bajeti za kila mwaka za utekelezaji wa Anwani za makazi.

Mwisho, ametoa shukrani za dhati na za kipekee kwa Rais wa Jamhuri ya Muungano wa Tanzania, Mhe. Samia Suluhu Hassan kwa kuendelea kufanikisha uwekaji wa Anwani za Makazi na kuiomba Wizara ya Habari kuendelea kutoa ufadhili ili kufanikisha zoezi hilo.