UWT WILAYA YA MOROGORO MJINI YAADHIMISHA MIAKA 46 YA CCM KWA KUGAWA MASHUKA KITUO CHA AFYA MAFIGA NA UPANDAJI WA MITI

KATIKA  kuadhimisha miaka 46 ya kuzaliwa kwa Chama Cha Mapinduzi CCM, UWT Wilaya ya Morogoro  Mjini imeadhimisha maadhimisho hayo kwa kugawa  shuka wodi ya wakina mama pamoja na vinywani , sabuni pamoja  zoezi la usafi na upandaji wa miti.

Akizungumza katika hafla ya kukabidhi vifaa hivyo Januari 29/2023,  Mwenyekiti wa UWT Wilaya ya Morogoro Mjini, Victoria Saduka, amesema maadhimisho hayo yatakuwa endelevu kwa miaka yote ya kuwakimbilia watu wenye uhitaji.

"Kituo hiki cha afya kinazidi kukuwa, kila uchwao idadi ya wagonjwa wanaongezeka, hivyo katika kuona wapi tunakwenda kupeleka baraka zetu, tumeona tufike hapa tugawe kila ambacho tumejaliwa, sisi kama wakina mama tunafahamu uchungu wa wenzetu hawa waliopo hapa Kituo cha afya , tutaendelea kushirikiana lengo ni kutekeleza Ilani ya CCM katika upande wa Sekta ya afya " Amesema Saduka.

Saduka, amesema  Serikali  kwa kutekeleza Ilani ya CCM itaendelea kutoa fedha  kwa ajili  kuboresha huduma ya Afya kwa jamii.

"Serikali iliyopo madarakani ni ya CCM na sisi tumejionea utekelezaji mzuri wa ilani yetu, tukasema kama Wanawake wa Wilaya ya Morogoro Mjini  hebu tuje pia kuweka mchango wetu wa mashuka  hapa Kituo cha Afya cha Mafiga ," Ameongeza  Saduka .

Naye, Katibu wa UWT Wilaya ya Morogoro Mjini,Aziza Hussein,  amesema juhudi kubwa za kimaendeleo zinazofanywa na Rais Dkt. Samia Suluhu Hassan  ndizo ambazo zimewafanya waone kwamba nao wanapaswa kumuunga mkono kwa kuchangia vifaa hivyo.

" Tumeguswa sana na kazi kubwa anayofanya Rais wetu Mhe. Dkt. Samia Suluhu Hassan, amejenga vituo vingi vya afya nchi nzima, sisi Manispaa ya Morogoro tuna vituo vya afya vikubwa tena vyenye hadhi ya Hospitali kabisa, haya mashuka tuliyoleta hapa Mafiga  ni kuonesha jinsi gani tunamuunga mkono" Amesema Aziza.

Aidha, Aziza, amempongeza Mjumbe wa Kamati ya Utekelezaji UWT Mkoa wa Morogoro, Sheilla Lukuba, kwa kuwaunga mkono kwa kutoa shuka 10 ambazo zimeelekezwa katika Kituo cha afya cha mafiga.

Mwisho, amewapongeza UWT wote, Kamati ya Utekezaji Wilaya, Madiwani wa Viti Maalum kwa jinsi walivyojitoa pamoja na wadau wengine wa UWT katika kufanikisha shughuli hiyo.

Kwa upande wa Mganga Mfawidhi wa Kituo cha Afya Mafiga, Dr. Anjelista Bigumile, ameushukuru Uongozi wa UWT Wilaya ya Morogoro Mjini kwa  kwa msaada huo kwani utawasaidia kwa kiasi kikubwa wahitaji.