TARURA YATOA ELIMU YA MFUMO WA MAEGESHO KIDIGITALI KWA VIONGOZI WA HALMASHAURI YA MANISPAA YA MOROGORO

 

MAMLAKA ya  Barabara za Vijijini na Mijini (TARURA) wametoa taarifa elekezi ya kuwajengea uwezo na Kutoa elimu kwa Viongozi wa Halmashauri ya manispaa ya Morogoro, Madiwani, Wakuu wa idara na vitengo pamoja na  Wawakilishi wa Vyombo vya Ulinzi na Usalama wa Wilaya kuhusu mfumo mpya wa Kielektroniki wa malipo ya Ushuru wa maegesho ya magari.

Taarifa hiyo imetolewa katika Mkutano maalumu wa baraza la madiwani manispaa ya morogoro katika kupitisha bajeti ya mwaka wa fedha 2022/2023.

Mfumo wa Maegesho Kidigitali (TeRMIS) ni mfumo wa Kielektroniki wa usimamizi na ukusanyaji wa mapato yatokanayo na maegesho ya vyombo vya moto (parking fee), matumizi ya Hifadhi za barabara (Road Reserve User Charges) pamoja na Adhabu kutokana na Ukiukwaji wa matumizi ya hifadhi za barabara.

Mfumo huu wa Kidigitali unampa muda mtumiaji wa maegesho kulipia Ushuru wa Maegesho ndani ya Siku 14 tangu alipotumia Maegesho na endapo atashindwa kulipa ndani ya muda huo atatakiwa kulipa Ushuru wa Maegesho pamoja na faini ya Shilingi 10,000/=.

Kwa Mkoa wa Morogoro, mtumiaji wa maegesho atatakiwa kulipa Shilingi 300 kwa Saa na Shilingi 1,000 kwa Siku.

Mfumo wa Maegesho Kidigitali unadhibiti mianya ya upotevu wa mapato ya Serikali kwani umeunganishwa na mfumo wa GePG ambapo Mtumiaji wa maegesho anapaswa kulipia ushuru wa maegesho baada ya kupatiwa kumbukumbu namba ya malipo (control number) na atatumia kumbukumbu namba hiyo kulipia maegesho kwa kutumia mtandao wowote wa simu ya mkononi, Benki ya NMB na CRDB au kupitia kwa Mawakala wa Huduma za fedha.

Lengo ni kuongeza ufanisi wa ukusanyaji wa mapato ya serikali yatakayosaidia kuboresha miundombinu ya barabara zote nchini.