RAS MOROGORO AWATAKA WAFANYAKAZI KUZINGATIA MAADILI YA KAZI ILI KUONGEZA UFANISI KAZINI.

Katibu Tawala Mkoa wa Morogoro, Mhandisi Emmanuel Kalobelo, akitoa zawadi kwa wafanyakazi hodari.

WAFANYAKAZI na Watumishi wa Umma Mkoa wa Morogoro,   wametakiwa  kuzingatia maadili ya kazi na kujiepusha na masuala ya rushwa na utovu wa nidhamu kazini. 

Rai hiyo imetolewa  Mei 1/2021 na Katibu Tawala wa Mkoa wa Morogoro, Mhandisi Emmanuel Kalobelo, akimwakilisha Mkuu wa Mkoa wa Morogoro, Mhe. Loata Sanare, katika maadhimisho ya Siku ya sherehe za Mei Mosi katika Uwanja wa Mpira wa Miguu wa Jamhuri.

Kalobelo, amesema kuna baadhi ya wafanyakazi wamekuwa wakikiuka maadili ya kazi na taaluma zao na kujikita wakiwa watovu wa nidhamu na kujikita kwenye masuala ambayo yako kinyume na utaratibu wa kazi hivyo ni vyema kwa kila mfanyakazi akazingatia maadili ya kazi zake. 

Aidha, amesema kuwa risala iliyoandaliwa ameipokea na kuifikisha katika ngazi za juu za uongozi huku akiwataka wafanyakazi kuwa wavumilivu katika kazi na wawe na matarajio makubwa na Serikali yao katika suala zima la stahiki zao ikiwamo kuongezwa mishahara pamoja na kupanda kwa madaraja kazini.

Kuhusu madeni ya wafanyakazi,  amesema kuwa Serikali inaendelea  kushughulikia madeni ya Watumishi wa Umma, hivyo Serikali mara itakapomaliza kuingiza madeni yote katika mfumo madeni hayo yatalipwa.

" Madeni yanayolipika hayatakiwi kufika katika madeni ya muda mrefu, hivyo nawaagiza viongozi wa taasisi wakayachuje madeni hayo , nitafanya ukaguzi wa madai ya Wafanyakazi kuona jisni yanavyofuatiliwa, tunakuwa na madeni makubwa kumbe ukiyachunguza utakuta wapo wafanyakazi wanadai pesa ndogo hizi zilipwe ,  tukilipa madeni madogo tunaweza kubaki na madeni makubwa lakini nazionya pia Taasisi zinazozalisha madeni kilazima" Amesema Eng. Kalobelo.

Amesema kuwa maslahi bora ya Wafanyakazi huongeza ufanisi mahala pakazi na kupunguza migogoro kazini, huku akiwaagiza waajiri wote wa Mashirika ya Umma na binafsi  kuweka Mazingira wezeshi kwa Wafanyakazi ili waweze kutimiza majukumu yao ipasavyo jambo ambalo litapunguza migogoro, na kuongeza ufanisi kazini. 

Amsema kuwa jukumu la kwanza la usalama wa afya za Wafanyakazi  katika Taasisi ni la Mkuu wa Taasisi, hivyo ni vyema maslahi yakazingatiwa  kwani dhamira ya Serikali kupandisha vyeo, mishara haijawahi kufutika na inakwenda kufanyiwa kazi hivyo Serikali ni sikivu itayafanyia kazi jambo hilo. 

Hata hivyo katika kuona wafanyakazi wanapata sehemu ya kuyasemea matatizo yao, amewakumbusha  waajiri kuwaunganisha Wafanyakazi katika vyama vya Wafanyakazi. 

Katika hatua nyengine, amesema Serikali ipo katika  hatua za mwisho za kufungua Ofisi za Jaji Mfawidhi wa Mahakama Kanda ya mashariki , huku akiitaka Ofisi ya Afisa Kazi Mkoa wa Morogoro kupitia na kufanya ukaguzi kwa Makampuni ambayo hayana mikataba na wafanyakazi na kuangalia mikataba ambayo imepitwa na wakati inayokandamiza haki za wafanyakazi.

Kuhusu maboresho ya mikataba ya wafanyakazi, amesema kuwa mikataba  mingi ya  Wafanyakazi imepitwa na wakati hivyo waajiri wazingatie kuiwishi mikataba hiyo huku wakishirikiana na viongozi wa vyama vya Wafanyakazi.

Kuhusu migogoro sehemu za kazi,amesema  Serikali itawasailiana na wahusika ili kufungua mahakama ya kazi kusuluhisha migogoro hiyo.

Hata hivyo mara baada ya kugawa zawadi za wafanyakazi hodari, amewataka wafanyakazi wote waviishi vigezo vya wafanyakazi hodari ili wafanyakazi wote wawe bora ili kuchangia maendeleo kwenda kwa kasi. 

Wakati huo huo, amesema ni vyema wafanyakazi wakaongeza  bidii na uzalishaji mali ili Taifa la Tanzania liweze  kufikia uchumi wa juu na kuliletea Taifa  maendeleo, huku akiipongeza Serikali kwa kudhibiti mfumuko wa bei wa vyakula na bidhaa.

 Katika hatua nyengine, amewataka waajiri kuanza kutoa mafunzo mapema ya wastaafu wanapokuwa kazini badala ya kusubiria baada ya mwaka mmoja ndio watoe mafunzo ya wastaafu jambo ambalo halina afya sana kwa wastaafu kutokana na kuchelewa kupata elimu ya ujasiriamali na kuishi maisha ya ustaafu wake.

Kwa upande wa Mwenyekiti wa vyama vya wafanyakazi Mkoa wa Morogoro, (TUCTA), Mohammed Simbeye, amemuomba Mkuu wa Mkoa kufuatilia kwa karibu mashirika yenye nia ya kuchafua jina la Mkoa  huo kwa kuzuia haki za wafanyakazi ikiwemo kuanzisha vyama vyao wakiwa katika maeneo yao ya kazi.

Simbeye, amemuomba Mkuu wa Mkoa  kusaidia kuwasukuma waajiri katika Mashirika mbalimbali yaliyoko Mkoani Morogoro ili wasajiri wafanyakazi wao katika mifuko ya bima ya Afya bila kujali kipato anachopata mfanyakazi husika.

Hata hivyo ameomba kuangaliwa kwa suala zima la viongozi ambao hawapendi vyama vya wafanyakazi.

Sherehe ya siku ya wafanyakazi hufanyika kila ifikapo Mei Mosi ya kila mwaka ikiwa na lengo la kutathmini mwenendo na hali za wafanyakazi ikiwa sambamba na kusikiliza na kutatua kero mbalimbali za wafanyakazi ambapo kauli mbiu ya mwaka huu 2021 ni " Maslahi bora, mishahara juu kazi iendelee".