JUMUIYA YA AHMADIYYA MOROGORO YATOA MSAADA WA VYAKULA KWA ZAIDI YA KAYA 100 ZENYE UHITAJI.

                   

Mkuu wa Wilaya ya Morogoro, Mhe. Bakari Msulwa, akimkabidhi mmoja wa wananchi zawadi ya mfuko wa unga pamoja na mchele.(kulia) Mkuu wa Chuo cha Jumuiya ya Ahmadiyya Morogoro, Sheikh Abid Mahmood Bhatti.

                    

                    

                    

                   

Mkuu wa Chuo cha Jumuiya ya Ahmadiyya Morogoro, Sheikh Abid Mahmood Bhatti (katikati) akimkabidhi Mkuu wa Wilaya ya Morogoro, Mhe. Bakari Msulwa zawadi ya Juzuu.

                  

Diwani wa Kata ya Kihonda Maghorofani, Mhe. Hamisi Ndwata.

JUMUIYA ya Kiislamu ya Ahmadiyya Morogoro imetoa msaada wa zaidi ya  Kaya 100 zenye uhitaji zilizopo  Kata ya Kihonda Maghorofani Manispaa ya Morogoro  kuelekea katika Sikukuu ya Eid Fitr.

Akizungumza mara baada ya kukamilika kwa zoezi hilo la ugawaji wa vyakula,DC Msulwa, ameomba mashirika na Taasisi zingine yakiwemo madhehebu ya dini kuelekeza misaada misaada mbalimbali kwa wananchi wenye uhitaji maalumu ili kutengeneza furaha na kudumisha umoja baina yao na wenye uhitaji .

DC Msulwa,  ambaye ndiye mgeni rasmi wa hafla hiyo fupi ya ugawaji wa chakula kwa wenye mahitaji, amesema Ahmadiyya wamefanya jambo la uchamungu ambalo linatakiwa liigwe na Taasisi nyengine.

Naye Mkuu wa Chuo cha Jumuiya ya Ahmadiyya Morogoro, Sheikh Abid Mahmood Bhatti, amesema kuwa  msaada huo umetolewa kuunga mkono wito wa serikali inayohimiza mashirika,taasisi,na watu binafsi kutoa misaada kwa jamii yenye uhitaji.

Bhatti, amesema licha ya kuunga mkono Serikali i lakini pia kuweza kutoa zakatul Fitri kwa jamii ili kuweza kujumuika na jamii kwa pamoja katika kusherehekea Sikuu ya Eid Fitr inayotarajiwa kuwa katika hizi siku mbili za usoni ambapo  itatokana na  muandamo wa mwezi.

"Jumuiya ya Ahmadiyya ni moja ya sehemu inayojihusisha na utoaji wa misaada mbalimbali ikiwemo ya kiafya,kielimu na kijamii kwa kuwafikia watu wenye uhitaji, hivyo kutoa kwetu chakula kwa watu wenye uhitaji kwanza tumetekeleza misngi ya dini , kwani sisi tumekuwa tukifanya hivi kila ifikapo Siku ya Eid basi tumekuwa tukijumuika na ndugu zetu kuhakikisha kwamba tunakuwa nao pamoja katika kusheherekea sikukuu hii " Amesema Bhatti.

Kwa upande wa Diwani wa Kata ya Kihonda Maghorofani, Mhe. Hamisi Ndwata, ameupongeza Uongozi wa Jumuiya ya Kiislamu ya Ahmadiyya Morogoro kwa kuwajali wananchi na kuweza kula pamoja Sikukuu hiyo.

Mhe. Ndwata, amesema Jumuiya hiyo mbali na kugawa vyakula kwa wenye mahitaji , lakini imekuwa mstari wa mbele katika kuchangia mambo mbalimbali ya maendeleo kama vile ujenzi wa madarasa wamekuwa wakijitoa saana.

"Mimi binafsi naridhika sana na ushirikiano wa Jumuiya hii, wamekuwa karibu sana na Jamii lakini hata katika kushiriki mambo ya maendeleo wamekuwa mstari wa mbele  sana kuchangia, hivyo nawaomba mwakani panapo uzima wagawe vyakula kwa idadi kubwa ya watu zaidi ya hapa" Amesema Ndwata.